Atyraýda jalǵan jarnamamen 15 adamnyń kóligin jalǵa alǵan alaıaq sottaldy
Atyraý oblystyq prokýratýrasynyń basqarma bastyǵy Bekbala Aqylbekovtiń málimetine súıensek, byltyr QR Qylmystyq kodeksiniń 190-babymen (Alaıaqtyq) 146 qylmystyq is sotqa jiberilgen.
«Alaıaqtyq – qylmystyq quqyq buzýshylyq. Onyń qurbany aldanýdyń nátıjesinde óz múlkinen aıyrylady. Máselen, S.M. áleýmettik jeli arqyly avtokólikti jalǵa alý jóninde jalǵan jarnama bergen. Osy jarnamaǵa aldanǵan 15 jábirlenýshi ózderiniń avtomashınalarynan aıyrylǵan. Olarǵa asa iri mólsherde múliktik zalal keltirilgen. Atyraý qalalyq №2 sotynyń úkimimen S.M. QR Qylmystyq kodeksiniń 190-baby 4-bóliginiń 2-tarmaǵymen kináli dep tanylyp, 6 jyl merzimge bas bostandyǵynan aıyryldy. Jábirlenýshilerdiń paıdasyna 74 mln teńge óndirildi», -dep habarlady Bekbala Aqylbekov.
Onyń aıtýynsha, alaıaqtarǵa zań aldynda báribir jaýap berýge týra keledi. Alaıaqtyq qylmysy jasaǵandarǵa múlki tárkilenip, aıyppuldan on jylǵa deıingi merzimge bas bostandyǵynan aıyrý jazasy kózdelgen.
«Alaıaqtyq qylmystyń kópshiligi bank kartalaryn paıdalaný, oǵan qashyqtan qol jetkizý arqyly jasalpdy. Alaıaqtar ózderin bank ókili retinde tanystyryp, karta paıdalanýshysyna qońyraý shalady. Kúmándi operatsııalardyń bolýy múmkin ekendigin habarlap, on buǵattaý maqsatynda mobıldi qosymshalardy ornatý jóninde nemese qupııa málimettiń habarlama kodyn suraıdy. Sondyqtan azamattarǵa ınternet alaıaqtardan saq bolýdy, bank kartasynyń málimetterin, kodtardy jáne qupııa sózderdi eshkimge habarlamaýdy usynamyz», -deıdi Bekbala Aqylbekov.
Eske sala ketelik, budan buryn Atyraýda ınternet arqyly jasalatyn alaıaqtyq qylmys óskenin habarlaǵan edik.