Atyraýda zeınetkerdiń páterinen aqsha salynǵan sómkeni urlaǵan kúdikti ustaldy
Oblystyq polıtsııa departamenti baspasóz qyzmetiniń málimetinshe, 14 qazanda Atyraý qalasynyń turǵyny shaǵym túsirgen.
«Shaǵymdanýshy aryzyndda 75 jastaǵy ájesiniń páterine belgisiz adam kirip, 60 myń teńge salynǵan sómkesin urlap ketkenin kórsetken. Tekserý kezinde páterdiń syrtqy esiktiń ashyq qalǵany anyqtaldy. Osyny paıdalanǵan ury úıge kirip, kireberiste turǵan sómkeni alyp, shyǵyp ketken. Atalǵan derekke qatysty QR Qylmystyq kodeksiniń 188-baby, 3-bóliginiń 3-tarmaǵymen (Urlyq) qylmystyq is qozǵaldy» -dep habarlady departamenttiń baspasóz qyzmeti.
Krımınaldyq polıtsııa basqarmasynyń qyzmetkerleri osy qylmysqa kúdikti 45 jastaǵy er adam ustady. Urlanǵan sómkesi men zeınetaqysyn qolyna qaıtaryp alǵan 75 jastaǵy áje polıtsııa qyzmetkerlerine rızashylyǵyn bildirdi.
«Polıtsııa qyzmetkerleri sómkemdi taýyp, qaıtaryp berdi. Sómkeniń ishinde sońǵy alǵan zeınetaqym bar edi. Atyraý qalasyndaǵy №1 polıtsııa bólimine, oblystyq departament bastyǵy Qamza Úmbetqalıevke jedel áreketi úshin raqmet aıtamyn» - deıdi zeınetker Meńdiǵalym Sadyrbaıqyzy.
Eske sala ketelik, budan buryn Atyraý oblysynda eńbek demalysynda júrgen polıtseı uryny ustaǵanyn jazǵan bolatynbyz.