Atyraýda zeınetker páterine qoqys qaldyǵyn jınaǵan
ATYRAÝ. QazAqparat – Atyraý qalasynda kópqabatty turǵyn úıde turatyn zeınetker páterine qoqys qaldyǵyn jınaǵan, dep habarlaıdy QazAqparat.
Bul týraly páter ıesiniń kórshileri qalalyq ákimdikke hat jazyp, kómek berýdi suraǵan.
«Zeınetker kórshimiz 30 jastaǵy ulymen turady. Kórshimiz kóshedegi qoqysty 13 jyldan beri páterine tasyp keledi. Qoqystyń sasyǵan ıisi kireberisten shyǵady. Demalý múmkin emes. «ArnaýlyAvtobaza» JShS-niń qyzmetkerleri kórshimizdiń páterinen tot basqan temirler, tozǵan kıimder men 4 gaz ballonyn shyǵardy» -deıdi kórshisi Valentına Sýhoteplaıa.
Onyń aıtýynsha, páterine qoqys jınaǵan zeınetkerdiń anasy uqypty, tazalyqty jany súıetin adam bolǵan. Sol kisi ómirden ótken soń zeınetker kórshisi qoqys jınaýdy bastaǵan.
Atyraý qalalyq turǵyn úı ınspektsııasynyń mamany Aman Latıpovtyń pikirine súıensek, páterge zalalsyzdandyrý júrgizý kózdelgen.
Eske sala ketelik, budan buryn Atyraýda Jaıyq jaǵalaýyn lastaǵan 150-ge jýyq adam jazalanǵanyn habarlaǵan bolatynbyz.
