Atyraýda zańsyz mıtıngke qatysqan 11 adamnyń jazasy jeńildedi

ATYRAÝ. QazAqparat – Atyraýda zańsyz mıtıngke qatysqan 11 adamdy ákimshilik qamaqqa alý merzimi qysqardy, dep habarlaıdy QazAqparat.

Oblystyq sottyń baspasóz qyzmetinen málim etkendeı, jergilikti 11 turǵyn bıylǵy 4-5 qańtarda «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» Zańnyń 2-babynyń talaptaryn buzyp, jergilikti atqarýshy organnyń ruqsatynsyz zańsyz mıtıngke qatysqan.

«Atyraý oblystyq sotynyń qylmystyq ister jónindegi sot alqasy Qazaqstan Respýblıkasynda qylmystyq-jazalaý is-áreketiniń belgileri joq beıbit jınalystardy uıymdastyrý jáne ótkizý tártibi týraly zańnamany buzǵany úshin qamaqqa alý túrinde ákimshilik jaýapqa tartylǵan 11 adamǵa qatysty ákimshilik quqyq buzýshylyq týraly isterdi qarady. Olar QR Ákimshilik quqyqbuzýshylyq týraly kodeksiniń 488-babynyń 6-bóligin buzǵan. Apellıatsııalyq satydaǵy sot ákimshilik qamaqqa alý merzimin tómendetip, isterdi qaraý kezinde ótelgen merzimmen shekteldi. Sonyń nátıjesinde 1 quqyq buzýshyǵa qatysty qamaqqa alý merzimi 13-ten 9 táýlikke deıin tómendetildi. Al, 3 adamǵa qatysty 10-nan 8-ge, 4 adamǵa qatysty 10-nan 7-ge, 2 adamǵa qatysty 10-nan 6-ǵa, 1 adamǵa qatysty qamaqqa alý merzimi 5-ten 3 táýlikke deıin qysqartyldy», -dep málim etti sottyń baspasóz qyzmetinen.

Sot aktileri zańdy kúshine endi.

Eske sala ketelik, buǵan deıin Atyraý oblysynda jappaı tártipsizdikke qatysqan 497 adam ustalǵanyn jazǵan bolatynbyz.