Atyraýda zańsyz balyq aýlaǵandarǵa 13,3 mln teńge aıyppul salyndy
ATYRAÝ. QazAqparat - Atyraýda zańsyz balyq aýlaǵandarǵa 13,3 mln teńge ákimshilik aıyppul salyndy, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Atyraýda eki aıǵa sozylǵan «Bekire-2018» aktsııasy aıaqtaldy. Balyq resýrstaryn qorǵaý jáne balyq aýlaýdy retteý basqarmasynyń basshysy Arman Ótepovtiń aıtýynsha shara kezinde 731 balyq qorǵaý zańyn buzýshylyq faktisi anyqtalǵan.
«Aktsııa kezinde balyq qorǵaý zańnamasyn buzýshylarǵa 13,3 mln teńge ákimshilik aıyppul salyndy jáne balyq resýrstaryna keltirilgen zalal úshin sot arqyly 686 myń teńge óndirildi. Balyq resýrstaryn qorǵaý qyzmetkerleri 502 zańbuzýshylyqty, quqyq qorǵaý organdary - 393, shekara qyzmetkerleri - 195 faktini anyqtady», - dedi A.Ótepov.
Sondaı-aq, «Aqjaıyq» memlekettik tabıǵı rezervaty jumysshylary shara barysynda erekshe qorǵalatyn tabıǵı aýmaqtarda 27 zańbuzýshylyqty anyqtady.
«19 tonna 717 kg balyq, onyń ishinde 3 tonna 799,1 kg bekire tuqymdas, 11 kg 400 gr bekire túrleriniń ýyldyryǵy, 460 dana aýlaý quraly jáne 63 qaıyq tárkilendi», - deıdi Atyraý oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy Danııar Baımaǵambetov.
