Atyraýda zańsyz aınalymnan 3972 bótelke alkogol men 2500 lıtr dızel alyndy
ATYRAÝ. QazAqparat – Atyraýda zańsyz aınalymnan 3 972 bótelke alkogol, 2 500 lıtr dızel alyndy, dep habarlaıdy QazAqparat.
Atyraý oblystyq memlekettik kirister departamentiniń baspasóz qyzmetinen málim etkendeı, aktsızdeletin ónimderdiń zańsyz aınalymyn anyqtaý, jolyn kesý is-sharalary júrip jatyr.
«Bıylǵy jyl basynan beri osyndaı is-sharalardyń nátıjesinde 3 972 bótelke zańsyz alkogol ónimderi anyqtaldy. Onyń ishinde 1 942 bótelke tárkilenip, 2 030 bótelke alkogolge qatysty is materıaldary Atyraý qalasynyń ákimshilik sotyna joldandy. Munaı ónimderin zańsyz jolmen satýmen aınalysqan jeke tulǵadan 2 500 lıtr dızeldik otyn tárkilendi», - dep habarlady departamenttiń baspasóz qyzmeti.
Eske sala ketelik, buǵan deıin balyqty zańsyz aýlaǵandarǵa 3 aptada 7,4 mln teńge aıyppul salynǵanyn jazǵan bolatynbyz.
