Atyraýda zańsyz alynǵan úsh páter anyqtaldy
ATYRAÝ. QazAqparat - Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń Atyraý oblysy boıynsha departamentiniń mamandary zańsyz alynǵan úsh páterdi anyqtady, dep habarlady «QazAqparat» HAA tilshisi.
«QR «Turǵyn úı qatynastary týraly» zańynyń 72-babyna sáıkes, turǵynjaı alý úshin esepke qoıýdan bas tartýǵa nemese úıge muqtajdar tiziminen shyǵarýǵa: sońǵy bes jylda tulǵanyń jer telimi, páteri nemese turǵyn úıi bolǵany anyqtalýy negiz bolady. Menshikteri tekserilgen tulǵalardyń ıeliginde jer telimi túrindegi jyljymaıtyn menshik bolǵany anyqtaldy», dep málimdedi Memlekettik qyzmet isteri jáne sybaılas jemqorlyqqa qarsy is-qımyl agenttigi departamentiniń basshysy Jánibek Qarajanov.
Faktiler turǵyn úı alýǵa kezekke turǵandardyń tizimin tekserý barysynda anyqtalǵan.
Osy rette aıta ketetin másele - Atyraýda memlekettik turǵyn úı qorynan turǵynjaı alý úshin 18 600 adam kezekte tur. Departamenttiń jyl saıynǵy tekseristeri barysynda alynǵan málimetterge qaraǵanda, kezekte turǵan 4000-ǵa jýyq adamnyń ótinishi talapqa sáıkes bolmaǵandyqtan olar tizimnen shyǵarylady.
