Atyraýda zańgerler turǵyndarǵa tegin keńes berdi
ATYRAÝ. QazAqparat - «Nur Otan» partııasynyń oblystyq fılıalynda ádilet organdarymen birlesken «Ádilet keńes beredi» aktsııasy ótti. Bul shara aıasynda memlekettik mekemelerdiń zańgerleri, advokattar, notarıýster turǵyndarǵa tegin keńes berdi, dep habarlady «Atyraý» gazeti.
Qabyldaýǵa kelgen azamattardyń basym bóligin alıment óndirýge qatysty suraqtar mazalaıdy. Sonyń biri Atyraý qalasynyń turǵyny Olga Pýstovalovanyń burynǵy jubaıy Germanııada turady. Ajyrasqannan beri balasyna alıment óndire almaǵan. Zańgerlerdiń aıtýynsha, eń aldymen, oblystyq sot arqyly Joǵarǵy sotqa shaǵymdanýy tıis. Odan ári Vena konventsııasymen is-qujattaryn Germanııaǵa jiberedi. Bul qyzmetterdi júrgizýge eki aı ýaqyt ketedi.
Al, Mahambet aýdany, Almaly selosynyń turǵyny Baqtyly Amanııazovanyń turǵyn úı ýchaskesindegi jer teliminiń biraz bóligin kórshisi zańsyz túrde qorshap alǵan. Ol sotqa shaǵymdanǵanymen, máseleni óz paıdasyna sheshe almaı dal. Endigi is-áreketi týraly keńes bergen mamandar aýdandyq ákimdik janyndaǵy komıssııaǵa jer telimine qatysty qujattardy qaıta teksertýge múmkindigi baryn aıtty. Sondaı-aq, bankterdiń birinen nesıege kólik alyp, tólemaqysyn birneshe aı ótemegen Ardaq Qambarovanyń da saýaly nazardan tys qalmady. Oǵan bank tarapynan kólikti keri qaıtarý jóninde talap túsken. Al, azamatsha isti ekijaqty tıimdi úılestirýdiń zańdylyǵyn suraıdy. Oblystyq qorǵaýshylar alqasynyń advokaty Janar Moldasheva bul máseleni utymdy sheshý úshin quzyrly organǵa jazbasha túrde aryzdaný qajettigin jetkizdi.
