Atyraýda zaǵıptar uıymy «Tsıfrly Qazaqstan» baǵdarlamasyn júzege asyrýǵa atsalysýda
ATYRAÝ. QazAqparat - Atyraý oblysyndaǵy múmkindigi shekteýli azamattardy qoǵamǵa aralastyrý, turmystyq jaǵdaıy tómen uıym múshelerine kómek berý maqsatynda qurylǵan «Móldir kóz» zaǵıptar qoǵamdyq birlestigi «Tsıfrly Qazaqstan» baǵdarlamasyn júzege asyrýǵa belsene atsalysýda, dep habarlaıdy QazAqparat tilshisi.
«Móldir kóz» qoǵamdyq birlestiginiń tóraǵasy Joldas Ǵumarovtyń aıtýynsha, qoǵamdyq birlestik zaǵıp jandardyń kompıýterlik saýattylyǵyn arttyrý baǵytyndaǵy jumystardy qolǵa aldy. Joba aıasynda zaǵıp jandar aqysyz oqytylady. Negizgi maqsat - olarǵa Microsoft Word qujatyn qurýdy, mátin jazýdy, ınternet jelisinde jumys jasaýdy, «Winamp» oınatqyshyndaǵy áýenderdi tyńdaý men kitap oqýdy úıretý.
«Budan buryn bul jobanyń pasporty men logotıpi daıyndaldy. Búginde 15 adamnan turatyn eki top saýat arttyrý jumystaryn bastady. Joba aıaqtalǵan soń qatysýshylarǵa arnaıy sertıfıkat tapsyrylady. Eki aıǵa sozylatyn oqytý kýrsyna kelem deýshilerge esigimiz ashyq. Alǵashynda tájirıbe retinde enip otyrǵan jobany aýdandarda júzege asyrý josparymyzda bar», - deıdi «Móldir kóz» qoǵamdyq birlestiginiń tóraǵasy J. Ǵumarov.
