Atyraýda VIP nómir alýshylar jalǵan túbirtek qoldanyp, 5 mln teńge tólemegen
Kólik ıeleriniń VIP nómirlerge suranysy artyp otyr. Alaıda, osyndaı nómirlerdi satyp alý kezinde jalǵan túbirtekti qoldanatyndar bar. Atyraý qalalyq prokýratýrasy VIP nómirlerdi jalǵan túbirtekpen satyp alǵandardy anyqtady.
«Satyp alynǵan nómirlerdiń somasyn bıýdjetke naqty túsimmen salystyryp tekserý kezinde 5 mln teńgeden astam qarajattyń túspegeni belgili boldy. VIP nómirlerdi satyp alýshylar tólem jasarda jalǵan túbirekterdi qoldanyp, memleketke zalal keltirgen. Qazir Atyraý qalalyq prokýratýrasy atalǵan derekke qatysty Qylmystyq kodekstiń 190-babynyń 3-bóligimen, 345-babynyń 3-bóligimen sotqa deıingi tergep-tekserý amaldary júrgizilip jatyr», - dep habarlady oblystyq prokýratýranyń baspasóz qyzmeti.
Al, Atyraý kólik prokýratýrasy jeke paıdalanýǵa arnalǵan kólik quraldaryn Eýrazııalyq ekonomıkalyq odaqtyń kedendik aýmaǵyna ýaqytsha ákelý kezinde zańdylyqtyń saqtalýyna taldaý júrgizgen.
«Taldaý kezinde Grýzııadan ákelingen Toyota land cruiser kóligi úshin kedendik tólemderdi júrgizbeı, zańsyz memlekettik tirkeýge qoıý deregi belgili boldy. Kólik prokýratýrasynyń aktisi negizinde oblystyq polıtsııa departamenti qalalyq sotqa talap aryz berip, ony qaraý nátıjesinde avtokólik ıesi memleket paıdasyna 8 mln teńge kóleminde kedendik baj ben ósimpul tóledi», - dep málim etti prokýratýradan.
Eske sala ketelik, budan buryn atyraýlyq alaıaq 97 adamnyń atynan kredıt alǵanyn https://kaz.inform.kz/news/atyraulyk-alayak-97-adamnyn-atynan-kredit-algan_a3934630 jazǵan bolatynbyz.