Atyraýda velosherýge baılanysty kólik qozǵalysyna shekteý qoıylady
ATYRAÝ. QazAqparat - 30 sáýir kúni Atyraýda qaıyrymdylyq velosherýiniń ótýine baılanysty ortalyq kóshelerde avtokólik qozǵalysyna shekteý qoıylady, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Kelesi dúısenbi Atyraýda «CharityBike Ride Atyrau - 2018» alǵashqy qaıyrymdylyq velosherýi ótedi. Júgirý qashyqtyǵy 9 shaqyrymdy quraıdy. Qatysýshylar oblystyq akademııalyq drama teatrynan sherýdi bastap, Sultan Beıbarys alańyna deıingi máre syzyǵyn júrip ótedi. Osyǵan oraı, Atyraýda 30 sáýirde 10:00-den 13:00-ge deıin tómendegi avtokólik joldary jabylady:
- Dramteatrdaǵy Abaı kóshesinen Mahambet kóshesiniń qıylysyna deıin;
- Mahambet kóshesinen Abaı kóshesiniń qıylysy men Azattyq dańǵylyna deıin;
- Azattyq dańǵyly men Mahambet kóshesiniń qıylysynan bastap Áýezov kóshesindegi aınalma jolǵa deıin;
- Áýezov kóshesindegi aınalma joldan Jılgorodok yqsham aýdanyndaǵy kópir arqyly Vladımırskıı kóshesine deıin;
- Vladımırskıı kóshesinen Sátpaev dańǵylyna deıin;
- Sátpaev dańǵylynan Ortalyq kópirge deıin.
Velosherýdi uıymdastyrýshylar Atyraý qalasynyń turǵyndarynan ýaqytsha týyndaıtyn keleńsizdikter úshin keshirim suraıdy.
Aıta keteıik, velosherýge kez kelgen nıet bildirýshi qatysa alady. Tirkelý ýaqyty - 8.00, bastalýy - 11.00-de. Velosherýge myna silteme arqyly tirkelýge bolady.
