Atyraýda vagondardyń aýdarylý sebebi belgili boldy
ASTANA. QazAqparat - «QTJ - Júk tasymaly» AQ baspasóz qyzmeti Atyraýdaǵy aýdarylyp qalǵan vagondardyń bastapqy sebepterin aıtty, dep habarlaıdy «QazAqparat» HAA.
«23 qańtar kúni 08 saǵat 44 mınýtta Atyraý bóliminiń Shoqpartoǵaı razezinde №2202 júk poıyzynyń bes vagony aýdaryldy. Oqıǵanyń bastapqy sebebi - vagonnyń dońǵalaqtaryndaǵy aqaýdyń bolýymen baılanysty»,-dep jazylǵan habarlamada.
Oqıǵadan eshkim zardap shekken joq. Poıyzdar kestege sáıkes júrip jatyr.
Sebepterdi anyqtaý maqsatynda arnaıy komıssııa qurylyp, tekserý jumystary júrgizilý ústinde.
Eske sala keteıik, Atyraý oblysynda egin tıelgen vagondar relsten shyǵyp ketken bolatyn. Júk poıyzy Qostanaı oblysynan Aqtaýdaǵy teńiz portyna bara jatqan.
