Atyraýda úzdik volonterler anyqtaldy
Oblys ákimi Mahambet Dosmuhambetovtiń aıtýynsha, volonterler naýqastardyń ómirin saqtap qalý úshin aıanbaı eńbek etti. Muqtajdar úshin qarjy jınap, dári-dármekter, azyq-túlik jetkizip berdi. Volonter – bir jaǵynan qaıyrymdylyq bolsa, ekinshiden, jas urpaq úshin úlgi-ónege bolatyn is. Volonterlikti serik etken jandardyń boıynda tolassyz erik-jiger men eń asyl qasıetter bar. Bul – meıirimdilik pen qaıyrymdylyq.
«Birlik – bizdiń qasıetti týymyz» dep Elbasy aıtqandaı, birlik pen tatýlyq qoǵamymyzǵa kúsh berip otyr. Sonyń nátıjesinde koronavırýs pandemııasyn birlese eńserip kelemiz. Teginde qıynshylyq pen aýyrtpalyqqa tózimdilikpen, rýhanı kúsh-jigermen tótep berý – yntymaq pen birliktiń aıqyn belgisi. Prezıdent Qasym-Jomart Toqaev óz sózinde «...Eriktilerdiń boıyndaǵy qaırat, jiger ár azamatty yntalandyrýy tıis. Bul – eń aldymen, órkenıetti eldiń jáne jaýapkershiliktiń belgisi» dep atap kórsetti. Volonterlerge zor senim arta otyryp, ádaıym abyroıly, tabysty bolýyna tilekshimin», - dedi oblys ákimi Mahambet Dosmuhambetov.
Atyraýlyq volonterdiń biri Bekasyl Samıǵolla osynaý ıgi isti 13 jasynda bastaǵan. Qazir ol jetekshilik etetin «AVK» jas volonterler korpýsy 50 jasóspirim úshin aǵylshyn tili kýrsyn uıymdastyrǵan.
«Aramyzda quqyqtyq, qarjylyq jáne tsıfrlyq saýaty tómen adamdar az emes. Sondyqtan bizdiń maqsatymyz – zańgerlerdiń, qarjygerler men IT mamandardyń qatysýymen oqytý kýrstaryn uıymdastyrý. Atyraý ekologııasy lastanǵan aımaqtar tizimine engendikten, endi turǵyndardyń ekologııalyq saýatyn arttyrý úshin jumys isteýdi josparlap otyrmyz», - deıdi Bekasyl Samıǵolla.
Volonter jylynyń qorytyndysymen «Jomart júrek» nomınatsııasynda bes volonter úzdik dep tanyldy. Máselen, Altyngúl Shakımova korporatıvtik eriktiligi, Arman Haırýllın qorshaǵan ortany saqtaýǵa qosqan úlesi, Gúlnaz Qosmurzıeva áleýmettik máselelerdi sheshýge atsalysqany úshin marapattaldy.
Al Marat Ómirzaqov «Jyl metsenaty», NCOC kompanııasy «Jyldyń úzdik uıymy» bolyp tanyldy.
«Byltyrǵy naýryzda eriktiler korpýsynyń quramynda qaıyrymdylyq maqsatta qarjy jınaýǵa qatystym. Bir aıda 7 mıllıon teńge jınadyq. Bizge iri kompanııalarmen birge, qarapaıym turǵyndar da kómek berdi. Sonyń nátıjesinde 2 myńǵa jýyq otbasy azyq-túlik sebetin aldy. Pandemııa kezinde dári-dármekterdi Reseıdiń Astrahan qalasynan aldyryp, muqtaj adamdarǵa tarattyq. Bizge 90-ǵa jýyq avtovolonter zor qoldaý kórsetti», - deıdi Gúlnaz Qosmurzıeva.
Sondaı-aq, bir top volonter «Halyq alǵysy» medalimen marapattaldy.
