Atyraýda úıirli shegirtkelerge qarsy hımııalyq óńdeý sharalary júrgizildi
ASTANA. QazAqparat - Atyraý oblysy boıynsha úıirli shegirtkelerge qarsy 2017 jyly 19530 gektar aımaqta hımııalyq óńdeý sharalary júrgizildi, onyń 14170 ga ıtalıandyq prýsqa, 5 360 ga azııalyq shegirtkege qarsy óńdeldi, dep habarlaıdy QR Aýyl sharýashylyǵy mınıstrliginiń baspasóz qyzmeti.
Oblysta jáne barlyq aýdan jáne qalada jedel áreket etý shtabtary qurylyp, hımııalyq óńdeý sharalarynyń júrý barysyn qadaǵalap otyrdy.
Qyzylqoǵa aýdanynda bıylǵy jyly 11000 gektar jerge hımııalyq óńdeýler júrgizilip, tıimdiligi 87-90 paıyzdy qurady. Aqtóbe jáne Batys Qazaqstan oblystarynyń mamandarymen birlesken zertteýler ótkizilip, shekaralar mańynda shegirtkeden qaýiptiń joq ekeni anyqtaldy.
Qazirgi tańda ýlanýǵa jatpaıtyn, ıaǵnı ádistemelik nusqaýlyqqa sáıkes ekonomıkalyq zııandylyq sheginen aspaıtyn (1 sharshy metrge 5 dernásilge deıin) shegirtke zııankesteriniń ushýy saıabyrsyp, shaǵylysýǵa túse bastaǵan. Sodan keıin olardyń tabıǵı ólýi bastalady. Ushý jáne shaǵylysý kezinde daqyldarǵa zııany tımeıdi.
Bıylǵy jyly saıaq shegirtkelerdiń (nestadka) Mahambet, Inder jáne Qyzylqoǵa aýdandarynda sany kóbeıgeni baıqaldy. Oblystyq bıýdjette qarjy qaralmaǵandyqtan, saıaq shegirtkelermen kúres sharýalar esebinen júrgizildi.
Qazirgi tańda jalpy Atyraý oblysy boıynsha úıirli shegirtkelerge qarsy kúres jumystary tolyq aıaqtalyp, shegirtkelerdiń shaǵylysýy, tuqym salýy boıynsha monıtorıngtik jumystar júrgizilýde.
