Atyraýda úıinen qashyp ketken oqýshy ata-anam namaz oqýǵa májbúrleıdi dep ótirik aıtqan
Oblys ákiminiń orynbasary Jasulan Bısembıevtyń tóraǵalyǵymen ótken komıssııa otyrysynda kámeletke tolmaǵandardyń quqyǵyn qorǵaý máselesi qaraldy.
Atyraý oblystyq din isteri basqarmasynyń basshysy Qaırolla Kóshqalıevtyń aıtýynsha, jasóspirimder tárbıesine basa mán berilýi qajet.
Óıtkeni olardyń keıbiri urlyqqa beıim ekeni anyqtalyp otyr.
«Hanafı mazhabyn ustanatyn otbasyndaǵy jasóspirim úıinen qashyp ketken. Teologtar bul otbasyndaǵy tárbıe máselesine zerdeleý júrgizdi. Sol kezde jasóspirimniń urlyq jasaýǵa beıim ekeni anyqtaldy. Jasóspirim aqtalý úshin ata-anasynyń namaz oqýǵa májbúrleıtini týraly ótirik aıtqan», - dep málim etti Qaırolla Kóshqalıev.
Onyń dereginshe, sport jattyqtyrýshylarynyń arasynda jat dinı aǵymdy ustanatyndar bar.
Bul sport úıirmelerine qatysatyn jasóspirimderge áser etý múmkin. Sol sebepten, sport zaldaryn «Sergek» beınebaqylaý júıesine qosý qajet.
Oblystyq dene shynyqtyrý jáne sport basqarmasy basshysynyń mindetin atqarýshy Nurjaýǵan Tóleýovanyń aıtýyna qaraǵanda, sport zaldaryna reıd júrgizilgen.
Reıd kezinde sport zaldarynda toptasyp namaz oqý deregi anyqtalmaǵan.
Budan buryn Atyraýda ákesi uryp-soǵyp, namaz oqýǵa májbúrlegen 11 jasar qyz polıtsııaǵa júgingenin jazǵan edik.
«Byltyr jasóspirim qyz ájesinen aýrýhanaǵa aparýdy ótingen. Aýrýhana dárigerleri jasóspirimniń denesinen jaraqatty, kógergen daqty, qabyrǵasy synǵanyn anyqtaǵan. Ol kezde bala dárigerlerge eshteńe aıtpaǵan. Al, bıylǵy qańtarda synyptasynyń ákesinen kómek suraǵan. Ol jasóspirimdi polıtsııaǵa jetkizgen. Polıtsııa qyzmetkerleri ákesinen qorlyq kórgen qyzdy kámeletke tolmaǵandardy beıimdeý ortalyǵyna ornalastyrdy», - deıdi Dılnaz Ádiljanqyzy paraqshasynda.
