Atyraýda ustazdarǵa qurmet kórsetildi
ATYRAÝ. QazAqparat - Atyraýda bilim berý salasy qyzmetkerleriniń kásibı merekesi atap ótildi. H.Dosmuhamedov atyndaǵy Atyraý memlekettik ýnıversıtetiniń «Jaıyq» sport kesheninde bilim berý salasynyń júzdegen muǵalimi men ardageri jınaldy, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Atyraý oblysynyń ákimi Nurlan Noǵaev bilim berý salasynyń qyzmetkerlerin quttyqtap, olardyń jas urpaqty tárbıeleýge qosqan úlesterin, úlken jaýapkershilikti jáne úlken qurmetke laıyqty eńbekterin atap ótti.
«Memleket basshysy Nursultan Nazarbaev óziniń sóılegen sózinde barlyq aspektilerde, onyń ishinde bilim berýde adamı kapıtaldyń sapasyn arttyrý jónindegi jumysty kúsheıtý qajettigin atap ótti. Sizderdiń moıyndaryńyzǵa aýyr júk artylǵan, bul - shákirterge beriletin bilim baılyǵy. Jyl saıyn jumystaryńyz óte kúrdelene túsýde, ýaqyt únemi jetildirýdi, jańa tehnologııalardy meńgerýdi jáne óz bilimderińizdi jańasha úıretý daǵdysyn talap etedi», - dedi Nurlan Noǵaev.
Óńir basshysy búgingi kúni aımaqta bilim berý sektorynyń materıaldyq-tehnıkalyq jáne ádistemelik bazasyn jetildirý, bilikti pedagogıkalyq kadrlardy tartýǵa, saqtap qalýǵa jáne qoldaýǵa baǵyttalǵan úlken jumystar atqarylyp jatqanyn atap ótti. Búgingi tańda oblystyń bilim berý salasyna 194 mektep, 328 balabaqsha, 3 joǵary oqý orny, 24 kolledj kiredi, onda 123 myńnan astam shákirt bilim alyp, 15 myńnan astam pedagog qyzmetkerler jumys isteıdi.
«Sizder qıyn, biraq laıyqty jáne mártebeli jumysty tańdadyńyzdar. Osy eńbektiń arqasynda júz myńdaǵan jasóspirim bilim alady. Olardyń kópshiligi halyqaralyq jáne respýblıkalyq baıqaýlar men olımpıadalardyń jeńimpazdary. Bul sizderdiń jumystaryńyzdyń kórsetkishi. Óz kezeginde memleket sapaly bilim alý úshin barlyq qajetti jaǵdaılardy jasaıdy», - dedi óńir basshysy.
Oblys ákimi kezdesýde pedagogıkalyq kadrlardyń jetispeýshiligin atap ótti. Ótken jyly jergilikti bıýdjettiń qoldaýymen 222 bilim granty bólingen, onyń 159-y pedagogıkalyq mamandyqtar boıynsha. 2018 jyly granttar sany 234-ke deıin ósti.
«Osy qarqynda biz, bes-alty jyldan keıin bilikti kadrlar tapshylyǵy máselesin sheshe alamyz. Biz turaqty básekelestik áleminde ómir súremiz. Tabysty damyp, básekelesý úshin laıyqty jáne bilimdi urpaqty tárbıeleý kerek», - dep atap ótti Nurlan Noǵaev.
Kezdesýdiń sońynda pedagogtardyń qurmetine arnalǵan gala-kontsert qoıyldy. Ustazdar qaýymy aldynda belgili ánshiler óner kórsetti, sondaı-aq teatrlandyrylǵan shoý ótkizildi.
Mereke sońynda oblys ákimi úzdik muǵalimderge «Qazaqstan Respýblıkasynyń bilim berý júıesiniń qurmetti qyzmetkeri» jáne «Y.Altynsarın» tósbelgilerin tabys etti. 
