Atyraýda ustalǵan «pedofıl» qamaýda kóz jumdy - feık

ATYRAÝ. QazAqparat – Atyraýda ustalǵan kúdiktiniń qaıtys bolǵany týraly jalǵan aqparat taraǵan, dep habarlaıdy QazAqparat.

Atyraý oblystyq polıtsııa departamenti baspasóz qyzmetiniń málimetinshe, jasóspirimdi zorlaýǵa oqtalý kezinde ustalǵan kúdiktiniń qamaýda qaıtys bolǵany týraly aqparat shyndyqqa janaspaıdy.

«Áleýmettik jeli qoldanýshylarynan kórineý jalǵan aqparat taratýǵa baılanysty QR Qylmystyq kodeksiniń 274-babymen jaýapkershilik kózdelgenin habarlaımyz. Qazir atalǵan derekke qatysty jalǵan jáne zańsyz aqparat taratqan adamdardy anyqtaý jumystary júrgizilip jatyr», -dep habarlady departamenttiń baspasóz qyzmeti.

Budan buryn Atyraý turǵyny 13 jasar qyzdy zorlamaq boldy degen kúdikpen ustalǵan edi.

Er adam «Reno Duster» kóligin zańsyz basqaryp ketip, kópqabatty úılerdiń aýlasyna toqtaǵan. Kólik salonynda 13 jastaǵy jasóspirim qyzdy zorlaýǵa oqtalǵan.

Atyraý qalalyq polıtsııa basqarmasynyń patrýldik polıtsııa batalony qyzmetkerleriniń jedel áreketiniń nátıjesinde kúdikti ustaǵan. 34 jastaǵy kúdiktige qatysty QR Qylmystyq kodeksiniń 120-babynyń 4 bóligimen, ıaǵnı jasóspirimdi zorlaýǵa oqtalý deregimen sotqa deıingi tergeý bastalǵan. Kúdikti tergeý ızolıatoryna qamaýǵa alynǵan.

Keıin kúdiktige qatysty jańa derekter aıtyldy.

Atyraý qalalyq polıtsııa basqarmasynyń kezekshi bólimine 6 jeltoqsanda saǵat 11:31-de «Renault duster» markaly avtokóligi urlanǵany habarlanǵan.

«Áıel adam kólikpen dúkenge barǵan. Qyzyn kólikte qaldyryp, ózi dúkenge kirip ketken. Dúkennen shyqqanda kóligin tappaı qalǵan. Patrýldik polıtsııa basqarmasynyń qyzmetkerleri urlanǵan kólikti Atyraý qalasyndaǵy «Avangard» shaǵynaýdanynda turǵanyn anyqtady. Kólikti 1988 jylǵy er adam urlap áketken. Al, kólik salonynda otyrǵan 13 jasar jasóspirim qyzǵa tserebraldy sal aýrýy dıagnozy qoıylǵan», -dep málim etti departamenttiń baspasóz qyzmetinen.