Atyraýda úshem dúnıege keldi
ATYRAÝ. QazAqparat - Atyraý oblystyq perınataldyq ortalyǵynda úshem dúnıege keldi, dep habarlaıdy QazAqparat tilshisi.
Baqytty ana Ardaq Jumaǵalıeva Qyzylqoǵa aýdany, Qonystaný aýylynyń turǵyny. Joldasy Ýálı Aıdarbekov ekeýinde buryn tórt uly bar edi. Endi birden jeti uldy boldy.
«Balany baılyq sanaıtyn qazaqpyz ǵoı. Joldasym Ýálı Aqtaý qalasynda vahtalyq ádispen jumys jasaıdy. Ózim úı sharýasymen, bala tárbıesimen aınalysamyn. Basymyzda úıimiz joq, sol ǵana kóńilge kirbiń túsirgeni bolmasa. Osydan on jyl buryn, ıaǵnı, 2008 jyly jerge aryz bergen edim. Áli alǵan joqpyn. Qazirgi turyp jatqanymyz erimniń áke-sheshesiniń úıi», deıdi Ardaq Jumaǵalıeva.
Úshem ómirge ota arqyly keldi. Mamyrdyń 22-si kúni perınataldyq ortalyqtyń bas dárigeri, hırýrg Qýanysh Nysanbaev ota arqyly ana men balalardyń ómirin aman saqtap qaldy.
«Úsh ul dúnıege keldi. Ana men balalardyń densaýlyqtaryn qadaǵalap otyrmyz. Salmaqtary eki keli 490 gramnan bastap, ekinshisi eki keli 685 gramm, úshinshisi úsh keli turatyn sharanalardyń jaǵdaılary jaqsy. Bir aptadan keıin úılerine shyǵady», - deıdi emdeýshi dáriger Aıgúl Saparǵalıqyzy.
Náresteler patologııasy bóliminiń meńgerýshisi Túrlen Begeevanyń aıtýynsha, dárigerler úshin de bul óte qýanyshty sát. Óıtkeni, ana men bala ómirinen qymbat esh nárse joq. Birinshi bala eki kún ókpeni jasandy demaldyratyn apparatta boldy.
