Atyraýda úsh kúnde 200-ge jýyq jasóspirim quqyq buzǵan
ATYRAÝ. QazAqparat – Atyraý oblysynda úsh kúnde 194 jasóspirim ákimshilik quqyq buzýshylyq jasaǵan, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, bul derek 14-16 shilde aralyǵynda ótkizilgen «Kanıkýl» jedel-profılaktıkalyq is-sharasy kezinde anyqtalǵan.
«Bul is-sharanyń maqsaty – kámeletke tolmaǵandar arasyndaǵy qylmysty boldyrmaý, aldyn alý. Sol sebepten, is-shara kezinde kámeletke tolmaǵandar jıi jınalatyn jertóle, saıajaı,ózen, kól jaǵalaýy, vokzal, saýda núkteleri jsekildi oryndar tekserildi. Іshki ister organdaryna ákimshilik quqyq buzýshylyq jasaǵany úshin kámeletke tolmaǵan 194 jasóspirim ákelindi. Jasóspirimder tarapynan jasalǵan 211 ákimshilik quqyq buzýshylyq deregi anyqtaldy. Osyǵan baılanysty 211 eresek tulǵa jaýapkershilikke tartyldy», -deıdi jergilikti polıtsııa qyzmeti basqarmasy ıývenaldy polıtsııa tobynyń erekshe tapsyrmalar jónindegi aǵa ınspektory, polıtsııa podpolkovnıgi Oryngúl Kóshqalıeva.
Onyń aıtýynsha, ishki ister organdarynyń profılaktıkalyq esebine bes, tizimdik esepke tórt kámeletke tolmaǵan jasóspirim, bir qolaısyz otbasy qoıylǵan.
«Jazǵy demalys kezinde jasóspirimderdiń qaýipsizdigin qamtamasyz etý maqsatynda birneshe máselege nazar aýdarý qajet. Jurtshylyqty ásirese, sýǵa ketý, jol-kólik, órt oqıǵalary saldarynan túrli dene jaraqatyn alý, kóp qabatty úılerdiń terezesinen qulaý derekteri alańdatyp otyr. Buralqy ıt te jasóspirimderdiń qaýipsizdigine qaýip tóndiredi. Osyndaı oqys oqıǵalardyń aldyn alý úshin buqaralyq aqparat quraldary men áleýmettik jelide, adamdar kóp shoǵyrlanatyn oryndarda, onyń ishinde qoǵamdyq kólik aıaldamalarynda, ortalyq bazarlarda, halyqqa qyzmet kórsetý ortalyǵynda foto-habarlandyrýlar ilinip, turǵyndar arasynda túsindirý jumystary júrgizildi» -deıdi Oryngúl Kóshqalıeva.
Eske sala ketelik, buǵan deıin Atyraýda úsh kúnde túnimen kóshede júrgen 70-ge jýyq jasóspirim ustalǵanyn habarlaǵan edik.
