Atyraýda úsh kúnde 20-ǵa jýyq mekeme karantın talabyn buzǵan

Budan buryn Atyraýda meıramhanalar men dámhanalardyń jumys ýaqyty 20:00-ge deıin qysqarǵan bolatyn.

Alaıda, keıbir kásipkerlik nysandardyń ıeleri bul talapty saqtamaı otyr. Mundaı derek Atyraý qalalyq Polıtsııa basqarmasy men qalalyq ákimdik qyzmetkerlerinen quralǵan monıtorıngilik toptyń júrgizgen reıdtik is-sharasynda anyqtalǵan.

«Máselen, 29 qańtarda keshki saǵat 21:40-ta B.Qulmanov kóshesinde ornalasqan «Chechil Pub» bary, al saǵat 22:45 shamasynda Azattyq kóshesinde «Vivaldi», saǵat 23:30-da Qarymsaqov kóshesindegi «Urban» meıramhanasy jumys istep turǵany belgili boldy. Atalǵan meıramhanalardyń árqaısysynyń ishinde shamamen 30-ǵa jýyq adam bolǵan.

Karantındik shekteý talabyn «Eldorado» meıramhanasy men «Kerýen» toıhanasy da buzǵan. Sońǵysynda 20-ǵa jýyq adamnyń qatysýmen týǵan kún keshi ótken. Sondaı-aq, «Morokko» meıramhanasynda 50-den astam adamǵa qyzmet kórsetilgen», - dep habarlady oblystyq Polıtsııa departamentiniń baspasóz qyzmetinen.

Al, 30 qańtarda «Ryba moeı mechty» karaoke-klýby, «Loto» oıyn-saýyq klýby, «Tofý», «Rodem», «Aspandııar» meıramhanalary shekteýli ýaqyttan keıin jumys istegeni belgili boldy. Buǵan deıin «Ryba moeı mechty» klýby men «Tofý» meıramhanasy karantın rejımin birneshe ret buzǵany úshin jaýapkershilikke tartylǵan edi. «Aspandııar» meıramhanasynda da týǵan kún keshi ótken.

Karantındik shekteý talabynyń buzylǵany 31 qańtarda da anyqtalǵan. Jeksenbi kúni «Masha ı Medved», «Káýsar», «Sultan Holl» meıramhanalarynda 40-50 adamǵa deıin qatysqan týǵan kún keshteri toılanǵan. Jumysker kentinde ornalasqan «Keremet» monshasy da kelýshilerge qyzmet kórsetken. Sondaı-aq, 31 qańtarda «Persona A», «Belýchı» kıim dúkenderi shekteýge qaramastan jumys istegen.

Karantın talaptaryn buzýmen baılanysty anyqtalǵan derekterge qatysty jınaqtalǵan is-qujattar Atyraý qalalyq Sanıtarııalyq-epıdemıologııalyq baqylaý basqarmasyna joldandy.