Atyraýda úsh kóligi bar kásipker eki jylda 4,8 mlrd teńgege shart jasasqan

ATYRAÝ. QazAqparat – Atyraýda shaǵyn kásipkerlik sýbektisi eki jylda 4,8 mlrd teńgege shart jasasqan. Alaıda onyń menshiginde úsh jeńil kólik tirkelgen, dep habarlaıdy QazAqparat tilshisi.

Atyraýda kásipkerlermen kezdesýde qurylys salasyndaǵy sybaılas jemqorlyq táýekeli talqyǵa tústi. Kezdesýge 87 qurylys kompanııasynyń, jobalaý, tehnıkalyq baqylaý jáne qadaǵalaý mekemeleriniń ókilderi qatysty.

Sybaılas jemqorlyqqa qarsy is-qımyl agenttigi Atyraý oblystyq departamenti preventsııa basqarmasynyń basshysy Jánibek Qarajanovtyń aıtýynsha, bul salada jekelegen kompanııalardyń jeńimpaz bolatyny anyqtalǵan.

«Tehnıkalyq qadaǵalaýdy júrgizý qyzmetine memlekettik satyp alý rásimderiniń nátıjesi boıynsha jekelegen kompanııalar ǵana jeńimpaz bolady. Mundaı kompanııalarda osyndaı jumystardy júrgizý úshin qajetti tehnıkalyq jabdyqtyń baryna kúmán týyndaıdy. Máselen, shaǵyn kásipkerlik sýbektisi 2022 jyly 3,6 mlrd, al 2023 jyly 1,2 mlrd teńge somasyna shart jasasty. Alaıda osy kásipkerlik sýbektisiniń menshiginde barlyǵy 3 jeńil avtokólik tirkelgen. Búgingi tańda kásipker memlekettik organdarmen 1 286 shartqa otyrǵan», -dep habarlady Jánibek Qarajanov.

Eske sala ketelik, buǵan deıin Atyraýda byltyrdan beri 3 mektepti kúrdeli jóndeý baıaý júrip jatqanyn habarlaǵan bolatynbyz.

Oblystyq bilim berý basqarmasy basshysynyń orynbasary Tilekqabyl Baıdoshevtyń málimetinshe, byltyr 6 mektepke kúrdeli jóndeý jumystary júrgizýge 2 mlrd 145 mln teńge qaralǵan. Onyń úsheýiniń jóndeý jumystary áli kúnge aıaqtalmaǵan.

Keıin 6 mekteptegi jóndeý jumysy jyl sońyna deıin jalǵasatynyn jazǵan edik.