Atyraýda úsh adamdy atyp óltirip, taǵy bireýin jaraqattaǵan jigittiń isi sotqa jetti
Oblystyq sottyń baspasóz qyzmetinen málim etkendeı, kúdiktige qatysty qylmystyq is QR Qylmystyq kodeksiniń 24-babynyń 3-bóligi, 99-babynyń 2-bóliginiń 1, 6-tarmaqtarymen tergelgen.
«Atyraý oblysynyń qylmystyq ister jónindegi mamandandyrylǵan aýdanaralyq sotynyń is júrgizýine QR Qylmystyq kodeksiniń 24-babynyń 3-bóligi, 99-babynyń 2-bóliginiń 1, 6-tarmaqtarymen aıyptalǵan K.B.-ǵa qatysty qylmystyq is tústi. Atalǵan qylmystyq is boıynsha basty sot otyrysy 2022 jylǵy 5 qyrkúıekte saǵat 15:00-ge taǵaıyndaldy», -dep málim etti Atyraý oblystyq sotynyń baspasóz qyzmetinen.
Buǵan deıin Atyraýda úsh adamdy atyp óltirip, bireýin jaraqattaǵan kúdikti qamaýǵa alynǵanyn jazǵan bolatynbyz.
Oblystyq polıtsııa departamenti baspasóz qyzmetiniń málimetinshe, atys 15 naýryzda saǵat 22:10 shamasynda bolǵan. Atyraý qalasynyń «Avangard-3» shaǵyn aýdanyndaǵy aıaldamada tapanshadan atylǵan oqtan 27 jáne 23 jastaǵy eki jigit qaza tapqan. Al, 1995 jylǵy 1 adam aýrýhanaǵa jetkizilgen.
Kúdikti oqıǵa ornynan boı tasalap qashyp ketken.
«Polıtsııa qyzmetkerleri atalǵan qylmysqa kúdikti retinde Mańǵystaý oblysynyń 1993 jylǵy týmasyn ustady. Atysqa azamattardyń arasynda týyndaǵan ózara kelispeýshilik sebep bolǵan. Kúdikti ýaqytsha ustaý ızolıatoryna qamaýǵa alyndy. Kúdiktige qatysty QR Qylmystyq kodeksiniń 99-babynyń 2-bóligimen tergeý amaldary júrgizilip jatyr», -dep habarlady departamenttiń baspasóz qyzmeti.
Keıin kúdiktiniń eki tapanshasy tabyldy.
Úsh adamdy atyp óltirgen kúdikti ustalǵan kezde tapanshasy bolmaǵan. Polıtseıler jedel izdestirý is-sharasyn júrgizip, 19 naýryzda terektiń túbinen eki tapanshany tapqan. Tapanshalar atys bolǵan shaǵyn aýdanda ósip turǵan terektiń biriniń túbine jasyrylǵan.