Atyraýda úsh adamdy atyp óltirip, bireýin jaraqattaǵan kúdikti qamaýǵa alyndy
ATYRAÝ. QazAqparat – Atyraýda úsh adamdy atyp óltirip, bireýin jaraqattaǵan kúdikti qamaýǵa alyndy, dep habarlaıdy QazAqparat.
Budan buryn Atyraýda atystan úsh adam mert bolyp, bireýi aýrýhanaǵa túskenin jazǵan edik.
Oblystyq polıtsııa departamenti baspasóz qyzmetiniń málimetinshe, atys keshe, 15 naýryzda saǵat 22:10 shamasynda bolǵan. Atyraý qalasynyń «Avangard-3» shaǵyn aýdanyndaǵy aıaldamada tapanshadan atylǵan oqtan 27 jáne 23 jastaǵy eki jigit qaza tapqan. Al, 1995 jylǵy 1 adam aýrýhanaǵa jetkizilgen.
Kúdikti oqıǵa ornynan boı tasalap qashyp ketken. Jedel-tergeý toby oqıǵa ornynda tergeý júrgizý kezinde taǵy bir adamnyń múrdesin tapqan. Tekserý kezinde onyń 27 jastaǵy er adam ekeni anyqtalǵan.
«Polıtsııa qyzmetkerleri atalǵan qylmysqa kúdikti retinde Mańǵystaý oblysynyń 1993 jylǵy týmasyn ustady. Atysqa azamattardyń arasynda týyndaǵan ózara kelispeýshilik sebep bolǵan. Qazir kúdikti ýaqytsha ustaý ızolıatoryna qamaýǵa alyndy. Kúdiktige qatysty QR Qylmystyq kodeksiniń 99-babynyń 2-bóligimen tergeý amaldary júrgizilip jatyr», -dep habarlady departamenttiń baspasóz qyzmeti.
Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.
