Atyraýda un tartatyn dıirmen iske qosyldy
ATYRAÝ. QazAqparat - Búgin Elbasynyń qatysýymen ótken «Indýstrııalandyrýdyń ekinshi besjyldyǵy: Qazaqstanda jasalǵan» atty jalpyulttyq telekópir barysynda Atyraýda un tartatyn dıirmen iske qosyldy, dep habarlaıdy QazAqparat tilshisi.
«Un tartatyn dıirmen jobasy aýyl sharýashylyǵyn damytýǵa baǵyttalǵan memlekettik baǵdarlamalar aıasynda qolǵa alynǵan. «Tsıfrly Qazaqstan» baǵdarlamasy da septigin tıgizdi. Dıirmen zamanaýı ıtalıandyq quraldarmen jabdyqtalǵan. Basqarý protsesi tolyǵymen avtomattandyrylǵan. Óndiristi planshet arqyly basqarýǵa bolady, - deıdi joba jetekshisi Rashıd Otarov.
Dıirmen «Dáýlet» jekemenshik ındýstrııalyq aımaǵynda ornalasqan. Keshenniń basty baǵyty - nan jáne makaron ónimderin daıyndaıtyn joǵary jáne birinshi suryptaǵy un alýǵa qajet bıdaıdy óńdeý. Untaq jarma men kebek shyǵarý da josparda bar. Mekemeniń maqsaty azyq-túlik jáne jeńil ónerkásipterde 100 paıyz qazaqstandyq mazmundy damytý, otandyq taýar óndirýdi ulǵaıtý.
Atyraý oblysynyń ákimi Nurlan Noǵaev telekópir bastalǵanǵa deıin óndirispen tanysyp, mundaı jobalar munaıly óńir úshin mańyzdy ekenin atap ótti. Jergilikti sapaly ónim bolashaqta syrttan keletin aýyl sharýashylyǵy taýarlarymen básekege túse alady.
Joba bastamashylarynyń aıtýynsha, óndiriske qajet bıdaı Soltústik Qazaqstannan satyp alynady. Shyǵarylatyn ónim Qazaqstannyń batys óńiriniń qajettiligin tolyq jabady. Bolashaqta dıirmen ónimderin TMD jáne Azııa elderine eksporttaý josparlanyp otyr.
Aıta ketelik, jalpy quny 4,4 mlrd teńge bolatyn joba jylyna 55 myń tonna ónim shyǵarady.
