Atyraýda «Uly dala kıesi» atty kórme ótýde

Sharanyń ashylý rásimine «Kaspıı Qubyr Konsortsıýmy» AQ bas dırektorynyń orynbasary Qaıyrgeldi Qabyldın, Atyraý oblysy ákiminiń orynbasary, «Nur Otan» partııasy oblystyq fılıalynyń basshylary, oblystyq maslıhatynyń depýtattary, munaı kompanııalarynyń ókilderi men sala ardagerleri qatysady.

Kórmeniń negizgi maqsaty - kópshilik arasynda ekologııalyq mádenıetti qalyptastyrý, dalanyń ań-qustary, onyń ishinde qazaqqa etene jaqyn kıikter týraly turǵyndardyń tanym kókjıegin keńeıtýge jáne qorshaǵan ortany qorǵaý problemalaryna qoǵamnyń nazaryn aýdartý.

Bul jaıynda Elbasy Nursultan Nazarbaev Astanada ótken kezekti ekonomıkalyq forýmda bylaı degen: «Búginde qorshaǵan orta boıynsha keshendik sharalar tysqary qalýda, árıne jahandyq bastama óte mańyzdy, alaıda ózge problemalar jeterlik, onyń ishinde jabaıy jan-janýarlar álemin de umytpaýymyz kerek», - degen edi.

Qazaqqa etene jaqyn osy janýardy qorǵaý jáne saqtap qalý isinde «Kaspıı Qubyr Konsortsıýmy» (KQQ) qosqan úlesi zor. Bul kompanııa bókenderdi ǵaryshtan baqylaýǵa múmkindik beretin 30 dana qarǵybaý satyp alýǵa 2016 jyly 21 mıllıon teńge bólse, ótken jyldyń ózinde tek zertteý jumystaryna 27 mıllıon teńge qarastyrǵan. Odan bólek KQQ Qazaqstan óz táýelsizdigin alǵaly beri el aýmaǵynda quny 8 mıllıard teńgege júzden asa áleýmettik jobany qarjylandyrǵan.

Tas dáýirinde Batys Eýropaǵa deıin tirshilik etken sol janýar osy kúni Mońǵolııa, Qalmaq dalasy men Qazaqstanda ǵana saqtalyp qalǵan. Olardyń 90 paıyzy qazaq jerinde mekendeıdi. Kıikterdiń taǵy bir ereksheligi - eshqashan jetim qalǵan laqtaryn dalaǵa tastamaıdy. Al kez kelgen kıik jolynan mańyrap shyqqan quralaıdy kezdestire qalsa, janyna baryp emizip, ózimen ertip ketedi.

Shara barysynda kıikter týraly fotosýretter jıyntyǵy kórsetilip, kontserttik baǵdarlama uıymdastyryldy.

Kórme 20 kúnge sozylady.