Atyraýda ulttyq ulan jaýyngerleri áıeldi órtten alyp shyqty
ATYRAÝ. QazAqparat - Ulttyq ulan jaýyngerleri Atyraýda áıeldi turǵyn úıdegi órtten qutqardy, dep habarlaıdy QazAqparat tilshisi.
«Batys» óńirlik qolbasshylyǵynyń baspasóz qyzmetinen túsken málimetke qaraǵanda, oqıǵa keshe keshkisin oryn alǵan. «Vodnık» kentindegi jeke úıden saǵat 18.30 shamasynda órt shyqqan. «Bekire-2019» jedel aldyn alý sharasynan qaıtyp kele jatqan jaýyngerler tútindi baıqap qalady. Quramynda 5546 áskerı bólimi jedel maqsattaǵy batalonynyń shtab bastyǵy, aǵa leıtenant Akbaralı Ahmadalıev, qatardaǵy jaýyngerler Madı Bıtohanov, Amanjol Ermahan bar top oqıǵa ornyna jetisimen órt jóninde jedel habarlap, qutqarýshylardy kútpesten kómekke umtylǵan. Áýeli tútin toly úıden áıeldi alyp shyqqan. Sosyn zattardy shyǵarǵan.
Ulttyq ulan jaýyngerleri órt sóndirýshiler kelgenshe, «tilsiz» jaýdy aýyzdyqtaýǵa tyrysqan. Keıin úı ıesi - Elmıra esimdi áıel Ulttyq ulan jaýyngerlerine alǵysyn bildirdi.
«Batyl qımyldaǵan jaýyngerler minsiz qyzmettiń úzdik úlgisin kórsetti. Ulttyq ulan sarbazy osyndaı bolýy tıis», - dedi 5546 áskerı bólim komandıri, podpolkovnık Maqsat Baımaǵulov.
Bólim komandıri qyraǵylyq pen batyldyq tanytqany úshin atalǵan jaýyngerlerdi kótermeledi.
