Atyraýda Ulttyq dombyra kúninde 6 sábı dúnıege esigin ashty
ATYRAÝ. QazAqparat - Búgin Atyraý oblysynyń perınataldyq ortalyǵynda bir ul, bes qyz bala dúnıege keldi.
Ulttyq dombyra kúnine oraı, Atyraý oblysy Qazaqstan halqy Assambleıasy men «Qoǵamdyq kelisim» mekemesi jáne oblystyq Analar keńesi «Babalardyń kózindeı, qasıetti Dombyra» qaıyrymdylyq aktsııasy aıasynda dúnıe esigin ashqan sábılerge qazaqtyń ulttyq dombyrasyn syıǵa tartty, dep habarlaıdy QazAqparat tilshisi.
Atalmysh aktsııanyń maqsaty qazaqtyń ulttyq aspaby dombyrany nasıhattaý arqyly ulttyq mádenıetti saqtaý.
Saltanatty shara barysynda Atyraý oblysy Qazaqstan halqy Assambleıa tóraǵasynyń orynbasary, hatshylyq meńgerýshisi Gúlmıra Shákirova analardy Ulttyq dombyra kúnimen quttyqtady. Sonymen qatar, sábılerin qushaǵyna alǵan analarǵa qazaqtyń ulttyq dombyrasy men taǵy basqa syılyqtaryn tartý etti.
«Kıeli de qasıetti Atyraý jerinde Elbasymyz belgilegen Ulttyq dombyra kúnin keń kólemde atap ótýdemiz. Munaıly Atyraý- kúı ordasy. Ataqty Qurmanǵazy babamyz ben Dına anamyz, kúı qaǵandary Rysbaı, Ázıdolla, Qarshyǵa atalarymyz ben qazirgi tańda bárimizdi ónerimen súısindirip otyrǵan Aıgúl Úlkenbaevanyń Otany. Sondyqtan bul merekeniń bizdiń elde ereksheligi óte zor. Bizder osy ataýly dataǵa oraı, analar keńesiniń quramy men músheleri jas analardy merekemen quttyqtap, jaqsy tilekterimizdi aıtyp, syı-sııapatymyzdy usyndyq», deıdi oblystyq analar keńesiniń tóraıymy Tamara Amantýrlına.
Búgin aıtýly Ulttyq dombyra kúninde dúnıege esigin ashqan sábı Kenjalıevterdiń tuńǵysh nemeresi. Іńkár esimdi jas ana sábıiniń týǵan kúnin osy dál osy merekemen tuspa-tus ákelgenine qýanyshty ekenin aıtady.
«Atyraý oblysynyń perınataldyq ortalyǵynda Ulttyq dombyra kúnine qaraǵan túni saǵat 00.20-da dúnıege ul bala ákeldim. Ortalyqtyń dárigerlerine alǵysym sheksiz. Óıtkeni, kúndizden beri qasymda dárigerler kómekterin aıamaı, janymda qamqorlyqtaryn kórsetip júr. Oılamaǵan jerden qazaqtyń Ulttyq dombyra kúnine tap bolyp turmyz jáne buǵan qýanyshtymyz. Ulttyq aspabymyzdy árqashan dáripteýge daıynbyz», deıdi jas ana Іńkár Jánibekova.
Eske sala ketsek, Memleket basshysy Nursultan Nazarbaev ulttyq mádenıet pen biregeılikti saqtaý men qaıta jańǵyrtý ıdeıasynyń tóńireginde qoǵamdy odan ári toptastyrý maqsatynda shildeniń alǵashqy jeksenbisin - Ulttyq dombyra kúni dep belgileý týraly Jarlyqqa qol qoıǵan bolatyn.
Atalǵan qujatqa sáıkes búgin Qazaqstan jurtshylyǵy Ulttyq dombyra kúnin alǵash ret atap ótti.
