Atyraýda ulttyq dombyra kúni qalaı toılandy
Atyraýda artyna mol shyǵarmashylyq mura qaldyrǵan qazaq óneriniń qaıtalanbas sańlaqtary, kúı atasy atanǵan Qurmanǵazy Saǵyrbaıulyna, kúı anasy Dına Nurpeıisova men QR Memlekettik syılyǵynyń laýreaty Qarshyǵa Ahmedııarovqa eńseli eskertkish qoıylǵan.
Búgin Ulttyq dombyra kúnine oraı óńirdiń zııaly qaýym ókilderi uly kúıshi Qurmanǵazy Saǵyrbaıulynyń eskertkishke gúl shoǵyn qoıdy.
«Alash jurty Atyraýdy ejelden kúı eli, kúıdiń Otany dep biledi. Ǵasyrdan ǵasyrǵa jetken batystyń kúıshilik óneri tarıhynyń tamyry tereńde jatyr. Kıeli topyraqtan Qurmanǵazy, Dáýletkereı, Dına, Esbaı men Balamaısan, Qarshyǵa men Rysbaı, Ázıdolla aǵalarymyz ben qazaq kúıiniń qazirgi maqtanyshy Aıgúl Úlkenbaeva túlep ushqan. Sondyqtan, Atyraýdyń kúıshilik ónerin ulttyq mádenıettiń kúre tamyrynyń biri retinde aıtýǵa tolyq negiz bar» -dedi oblys ákimi Mahambet Dosmuhambetov.
Ákimniń aıtýynsha, qazaqpen birge egiz uǵymǵa aınalǵan dombyra – ulttyq brendtiń biri. Sol sebepten, ulttyq a kúniniń merekeler kúntizbesine engeni ulttyq rýhanııatymyzǵa sony serpin berdi.
«Óıtkeni, dombyra – ulttyń úni men jany ǵana emes, myńdaǵan jyldar boıy halqymyzben birge jasap kele jatqan qasterli qasıeti. Baǵzy babalardan jetken basty baılyǵymyz. Sondyqtan, dombyrasyz ult mádenıeti tarıhyn kóz aldymyzǵa elestetý múmkin emes» -dedi Mahambet Dosmuhambetov.
«Naryn» halyq aspaptar orkestri ashyq aspan astynda Qurmanǵazy Saǵyrbaıulynyń «Serper», «Balbyraýyn» jáne basqa da birneshe kúıin oryndady.
