Atyraýda TJM óńirlik departamentiniń basshysy para alý kúdigimen ustaldy

ATYRAÝ. QazAqparat – Atyraýda Tótenshe jaǵdaılar mınıstrligine qarasty ónerkásiptik qaýipsizdik departamentiniń dırektory para alý kúdigimen ustaldy. Kúdikti óz kinásin moıyndaǵan, dep habarlaıdy QazAqparat tilshisi.

Bul týraly Sybaılas jemqorlyqqa qarsy is-qımyl agenttiginiń Atyraý oblystyq departamenti basshysynyń ýaqytsha mindetin atqarýshy Erulan Serikqalıev málim etti.

Onyń aıtýynsha, Tótenshe jaǵdaılar mınıstrligine qaraıtyn Atyraý oblysy boıynsha ónerkásiptik qaýipsizdik departamentiniń basshysy para alý kúdigimen ustalǵan.

Kúdikti óz kinásin moıyndaǵandyqtan qamaýǵa alynbaǵan.

«Qazir para alǵany úshin ustalǵan kúdiktige qatysty QR Qylmystyq kodeksiniń 366-babymen sotqa deıingi tergeý júrgizilip jatyr. Bul qylmystyq istiń mán-jaıy týraly aqparat keıinirek beriledi», -dep málim etti jergilikti sybaılas jemqorlyqqa qarsy qyzmet basshysynyń mindetin ýaqytsha atqarýshy Erulan Serikqalıev.

Budan buryn sybaılas jemqorlyq deregimen Atyraý oblysy ákiminiń eki orynbasary sottalǵan bolatyn.

Onyń biri ákimniń burynǵy birinshi orynbasary 10 jylǵa sottaldy.

Sot úkimimen ákimniń burynǵy birinshi orynbasary Nurlan Taýbaevqa 10 (on) jyl bas bostandyǵynan aıyrý jazasy taǵaıyndaldy.

Oblys ákiminiń taǵy bir burynǵy orynbasary Baqytgúl Hamenova 7 jylǵa sottalǵanyn jazǵan edik.

«Sot Baqytgúl Hamenovanyń qabyldaǵan antty buzý arqyly qylmys jasaǵanyn jazany aýyrlatatyn jaǵdaı dep tanydy. Jeńildetetin mán-jaı retinde jas balalarynyń bary eskerildi. Sottalýshyǵa ómir boıyna memlekettik qyzmette laýazymdardy atqarý quqyǵynan ómir boıyna, 7 jyl merzimge bas bostandyǵynan aıyrý jazasy taǵaıyndaldy. Eki jas balasynyń bolýyna baılanysty QR Qylmystyq kodeksiniń 74-babynyń 1-bóligine sáıkes jazany óteý merzimi 3 jylǵa keıinge qaldyryldy», -delingen sottyń habarlamasynda.

Sondaı-aq, Atyraýda QTJ fılıalynyń dırektory qamaýǵa alynǵan edi.