Atyraýda tyrnaǵy julynǵan qyzdyń ata-anasy balabaqsha tólemaqysynan bosatyldy

ATYRAÝ. QazAqparat – Atyraýda jaraqat alǵan 3 jasar qyzdyń ata-anasy balabaqsha tólemaqysynan bosatyldy. Al, sábı balabaqshaǵa qaıta oralady, dep habarlaıdy QazAqparat tilshisi.

Oqıǵa 26 maýsymda Atyraý qalasynyń irgesindegi Vodnıov aýylyndaǵy balabaqshada bolǵan. Úsh jasar Ásııanyń ákesi Erjan Tájenovtiń aıtýynsha, qyzyn oblystyq balalar aýrýhanasyna balabaqsha qyzmetkerleri aparǵan.

«Nartaılaq» jekemenshik balabaqshasynyń dırektory Ánııa Tóleshova sol kúni basqa qalada bolǵan. Onyń aıtýynsha, balabaqsha 2013 jyly ashylǵan. Qazir onda 2-6 jas aralyǵynda 124 bala bar.

«Men eńbek demalysyna shyǵyp, Atyraýda bolmaǵan edim. Úsh jasar qyzdyń jaraqat alǵanyn estip, oqıǵanyń mán-jaıyn bilý úshin keldim. Ata-anasymen kezdestik. Jaraqat alǵan balaqaıdyń emine qajetti shyǵynyn ótep beremiz», - dep málim etti Ánııa Tóleshova.

Saýsaǵynan jaraqat alyp, tyrnaǵy julynǵan 3 jasar Ásııanyń ákesi Erjan Tájenov balabaqsha basshylarymen kelisimge kelgen.

«Balabaqsha dırektory úıge keldi. Ol oqıǵa bolǵan kúni Atyraýda emes, ózge qalada bolǵanyn aıtty. Basqa qaladan kelgenin dáleldeıtin bıletin kórsetti. Biz ózara kelisimge keldik. Endi balabaqsha basshylaryna eshqandaı talap qoımaımyn. Qyzym balabaqshaǵa barǵysy kelip júr. Jaraqaty jazylǵan soń qaıta barady», - dedi Erjan Tájenov.

«Nartaılaq» balabaqshasynyń basshylary jaraqat alǵan qyzdyń ata-anasyn aı saıynǵy tólemaqydan bosatyp otyr. Tek kúndelikti beriletin tamaqtyń qarjysyn tóleıdi.

Budan buryn balabaqshada 3 jasar balanyń jaraqat alýyna baılanysty tergeý bastalǵanyn habarlaǵan edik.