Atyraýda týysynyń kóligin urlap aıdap ketken jasóspirim ustaldy
ATYRAÝ. QazAqparat – Atyraýda týysynyń kóligin aıdap ketken jasóspirim ustaldy, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, 3 maýsymda 102 operatoryna Vodnık eldi mekenindegi úı aýlasynda turǵan avtokólikti belgisiz bireý aıdap ketkeni týraly habar túsken.
«Kóshelerdegi beınebaqylaý kameralary arqyly jedel izdestirilgen «Volkswagen Jetta» markaly avtokóliktiń Mahambet-Abaı kósheleriniń qıylysynan ortalyq kópirge qaraı baǵyt alǵany baıqaldy. Patrýldik polıtsııa qyzmetkerleri atalǵan kólikti 3 mınýttan soń Sátbaev kóshesinde toqtatty. Tekserý kezinde kóliktiń rýlinde kámelet jasqa tolmaǵan, ıaǵnı 2003 jyly týǵan jasóspirim otyrǵany anyqtaldy. Belgili bolǵandaı, rýldegi jasóspirim kólik ıesiniń jaqyn týysy bolyp shyqty» -dep habarlady departamenttiń baspasóz qyzmeti.
Kólikti zańsyz aıdap ketken 17 jastaǵy jasóspirimniń ata-anasyna qatysty QR Ákimshilik quqyqbuzýshylyq týraly Kodeksiniń 612-babynyń 2-bóligimen (Kólik quralyn basqarý quqyǵy joq adamnyń ony (júrgizip-úırenýden basqa) basqarýy, sol sııaqty tıisti sanattaǵy kólikti basqarý quqyǵy joq júrgizýshiniń kólik quralyn basqarýy) hattama toltyryldy.
Eske sala ketelik, budan buryn Atyraýda kólik júrgizgen oqýshy balanyń anasy jaýapqa tartylǵanyn jazǵan edik.
