Atyraýda tutqyndaǵy adamdardy azaptady dep aıyptalǵan 5 polıtseıdiń isi sotqa jetti
Atyraý oblystyq prokýratýrasynyń baspasóz qyzmetinen málim etkendeı, bıylǵy qańtardan bastap azaptaý týraly qylmystardy tek prokýratýra organdary tergeıdi.
«El Prezıdenti Qazaqstan halqyna Joldaýynda azaptaýdy progressıvti qoǵamnyń qaǵıdalaryna qaıshy keletin orta ǵasyrlardan qalǵan jabaıylyqqa teńedi. Atyraý oblystyq prokýratýrasy adamdardy azaptady degen kúdikpen Atyraý qalalyq polıtsııa basqarmasynyń 5 jedel ýákiline qatysty QR Qylmystyq kodeksiniń 146-babynyń 2-b óliminiń 1-tarmaǵymen qozǵalǵan qylmystyq isti sotqa joldady. Polıtsııa qyzmetkerleri bıylǵy aqpanda aldyn ala sóz baılasyp, azamat R-ǵa qylmysty moıyndatý maqsatynda anyqtaýdyń ruqsat etilmegen ádisterin qoldanǵan, tán jáne psıhıkalyq zardap keltirdi degen kúdikke ilindi. Elimizdiń Ata zańy kepildik bergendeı, eshkimdi azaptaýǵa, oǵan zorlyq-zombylyq jasaýǵa, basqadaı qatygezdik nemese adamdyq qadir-qasıetin qorlaıtyndaı jábir kórsetýge ne jazalaýǵa bolmaıdy. Zańdy negizderdi qospaǵan jaǵdaılardy qylmystyq qýdalaý orbıtasyna tartýǵa jol berilmeıdi», -dep habarlady prokýratýranyń baspasóz qyzmeti.
Eske sala ketelik, budan buryn Atyraý polıtseıleriniń 2 myńnan astam zańsyz qaýlysynyń kúshi joıylǵanyn habarlaǵan bolatynbyz.
Atyraý qalalyq prokýratýrasynyń málimetinshe, polıtsııa qyzmetkerleri quqyq buzýshylyq quramynyń belgileri bolmasa da jeke tulǵalardy ákimshilik jaýapkershilikke tartqan.
Atyraý qalasynyń prokýrory engizgen narazylyqpen atalǵan bappen ákimshilik quqyq buzýshylyq týraly isterge shyǵarylǵan 1 079 qaýlynyń kúshi joıyldy.
Jalpy 2 myńnan astam ákimshilik qaýlynyń kúshi joıylyp, 24 polıtsııa qyzmetkeri tártiptik jaýapkershilikke tartyldy.
