Atyraýda túsik tastaǵan áıel hál ústinde jatyr
ATYRAÝ. QazAqparat - Atyraýda ishtegi nárestesinen aıyrylǵan 40 jastaǵy áıel jasandy uıqyǵa jatqyzyldy, dep habarlaıdy QazAqparat.
Áıel oblystyq aýrýhananyń jansaqtaý bólimine ótken aptanyń sońynda jatqyzylǵan. Onyń aıaqasty dene qyzýy kóterilip ketken.
Sársenbi kúni jasandy túsik jasaý týraly sheshim qabyldanǵan. Alaıda odan keıin de áıeldiń beti beri qaramaǵan.
«Qazirgi tańda áıel aýyr halde jatyr. Dári egip, uıyqtatyp tastadyq. Oblystyq densaýlyq saqtaý basqarmasy áıeldiń densaýlyǵyn jiti qadaǵalap otyr. Ony saýyqtyryp shyǵarý úshin barlyq jaǵdaı jasalyp jatyr» delingen oblystyq densaýlyq saqtaý basqarmasynyń habarlamasynda.
Eske sala keteıik, Atyraý oblysyndaǵy perınataldyq ortalyqta qarasha aıynyń basynda júkti áıel bosana almaı qaıtys bolǵan edi. Qazirgi tańda bul oqıǵaǵa qatysty tekserý júrgizilip jatyr.
