Atyraýda túrmege tramadoldy dezodorantqa jasyryp ótkizbek bolǵan
Atyraý oblystyq qylmystyq-atqarý júıesi departamenti baspasóz qyzmetiniń málimetinshe, tergeý ızolıatorynda urlyq jasaǵany úshin qamaýǵa alynǵan kúdiktige ákelgen sálemdemelerdi tekserý kezinde dezodorant ishinen 377 tramodol dárisi tabylǵan.
«Mekeme qyzmetkerleriniń qyraǵylyǵynyń nátıjesinde zańsyz sálemdeme ıesine jetken joq. Tergeý ızolıatoryna Atyraý qalalyq polıtsııa basqarmasynyń jedel tergeý toby shaqyrtylyp, sálemdemeni ákelgen er adam ustaldy», - dep habarlady departamenttiń baspasóz qyzmeti.
Qazir zańsyz sálemdeme ákelgen azamatqa qatysty QR Ákimshilik quqyqbuzýshylyq týraly Kodeksiniń 481-babymen (Qylmystyq-atqarý júıesiniń mekemelerinde, arnaýly mekemelerde ustalatyn adamdarǵa tyıym salynǵan zattar, buıymdar men nárseler berý) ákimshilik hattama toltyryldy. Іs materıaldary sotqa joldandy.
Eske sala ketelik, budan buryn Atyraýda velosıpedpen esirtki tasymaldaǵan er adam ustalǵan bolatyn.