Atyraýda túrmege tıym salynǵan zattardy kirgizbek bolǵan 14 adam jazalandy
Atyraý oblysy prokýrorynyń orynbasary Nurjan Serikulynyń aıtýynsha, qylmystyq-atqarý júıesi mekemeleriniń ishki tártip qaǵıdalarynda kózdelmegen zattar, zattekter, tamaq ónimderin saqtaýǵa jáne paıdalanýǵa tyıym salynǵan.
«Alaıda, «qamqor» týystar men dostary ózderiniń bastamasymen ne qamaýdaǵylardyń ótinishimen túrmege tyıym salynǵan zattardy qasaqana ákelýge tyrysatyn jaǵdaılar jıi kezdesedi. Alkogoldik ishimdik, dárilik jáne basqa da eseńgiretetin zattar, aqsha, tamaq ónimderi, buıymdar, Qylmystyq-atqarý júıesi mekemelerinde saqtaýǵa jáne paıdalanýǵa tyıym salynǵan basqa da zattardy kez kelgen tásilmen berý áreketi ákimshilik, al jekelegen jaǵdaılarda qylmystyq jaýaptylyqqa ákelip soǵady. Byltyr aqsha, telefon, alkogol jáne esirtki zattaryn alyp ótýge tyrysqany úshin 14 adam ákimshilik jaýapqa tartyldy. Mekeme qyzmetkerleri tyıym salynǵan zattardyń 3 deregin anyqtady», -dep habarlady Nurjan Serikuly.
Onyń aıtýynsha, esirtki zattaryn penıtentsıarlyq mekemege ákelgen S. esimdi azamat ustalǵan. Keıinnen oǵan qatysty QR Qylmystyq Kodekstiń 297-babynyń 1-bóligimen qozǵalǵan is sotqa berilgen.
«Qazir bas bostandyǵynan aıyrý oryndaryna telefondardy alyp ótkeni úshin qylmystyq jaýaptylyqty engizý máselesi qarastyrylyp jatyr. Al, psıhotroptyq zattardyń tizimine tramadol, ketamın jáne basqalary engizildi. Sol sebepten, azamattarǵa qylmystyq zańmen qýdalanatyn teris áreketterge barmaý qajettigin eskertemiz», -deıdi Nurjan Serikuly.
Eske sala ketelik, buǵan deıin Atyraýda sońǵy 2 jylda 18 myń danadan astam psıhotropty dári tárkilengenin jazǵan edik.