Atyraýda týrıstik fırma 50-den astam adamdy aldaǵan
Oblystyq polıtsııa departamentiniń baspasóz qyzmetinen málim etkendeı, týrıstik fırmaǵa qatysty 18 adamnan túsken.
«Zardap shekkender jábirlenýshi retinde tanylyp, jaýap alyndy. Jábirlenýshilerdiń málimetine sáıkes, týrıstik fırmanyń dırektory Almaty qalasynda emdelýge ketken. Qazir týrıstik fırmaǵa qatysty tergeý bastaldy. Tergeý QR Qylmystyq kodeksiniń 190-babynyń 3-bóliminiń 3) tarmaǵymen júrgizilip jatyr. Ózge aqparat jarııalaýǵa jatpaıdy», -dep habarlady Atyraý oblystyq polıtsııa departamentiniń baspasóz qyzmeti.
Týrıstik fırmaǵa 50-den astam adam aldanǵan. Atyraýlyq týrıster Túrkııa men Egıpetke, Grýzııaǵa joldama satyp alǵan. Alaıda, olar demalysqa usha almaı qalǵan. Olarǵa aqshasy qaıtarylmaǵan. Aldanǵandardyń aıtýynsha, týrıstik fırma 100 mln teńge qaıtarýy tıis.
«Meniń jubaıyma 26 tamyzda týroperator Svetlana qońyraý shalyp, keńsege shuǵyl jetý qajettigin aıtty. Jumystan shyǵyp, keńsege barǵan oǵan týrfırma dırektory Marta joldamalar aqysyn tólemegin, onyń baılanysqa shyqpaǵany týraly habarlaǵan. Osy kezde týrıstik fırmanyń keńsesinde osyndaı qıyndyqtarǵa tap bolǵan basqa adamdar da boldy. Biz Whatsapp chatyn qurdyq. Onda shamamen 30 adam bar. Olardyń bári balalarymen demalysqa barýdy josparlaǵan», -deıdi qala turǵynynyń biri A.S.
Ol otbasymen Atyraýdan Egıpetke 31 tamyzda ushyp ketpek bolǵan. Joldamanyń quny 1 mln 500 myń teńgeden asady.
Jergilikti týrısterdi aldaǵan týrıstik fırma qyzmet kórsetý naryǵynda úsh jyldan beri qyzmet kórsetedi. Týrfırma 2018 jyly qurylǵan.
«Biz osy týrfırmaǵa júgingen edik. Óıtkeni 2021 jyldyń qazan aıynda osy týrfırma arqyly joldama alǵanbyz. Sol kezde jaqsy demalǵan bolatynbyz. Bulaı bolady dep oılaǵan joqpyz. Týrıstik fırma qyzmetkerleri «Eshteńe bilmeımiz. Dırektor baılanysqa shyqpady» dedi, -deıdi taǵy bir jábirlenýshi.
Qazir týrıstik fırma jumysyn toqtatqan.
Eske sala ketelik, budan buryn Atyraýda 20 adamdy aldaǵan alaıaqqa qatysty tergeý júrip jatqanyn jazǵan bolatynbyz.
