Atyraýda turǵyn úıler men zırattardy tonap kegen 4 adam ustaldy
Oblystyq polıtsııa departamenti baspasóz qyzmetiniń aqparatyna qaraǵanda, kúdiktilerdiń jasy 29 – 33 jas aralyǵynda.
«Atyraý qalalyq №2 polıtsııa bóliminiń qyzmetkerleri jedel-izdestirý is-sharasy kezinde shahar aýmaǵyndaǵy turǵyn úılerge, oǵan qosa zırattarǵa urlyqqa túsken 1989, 1992, 1992 jáne 1993 jyly týǵan tórt kúdiktini anyqtap, ustady. Kúdiktiler aqpan-mamyr aılary aralyǵynda aldyn ala sóz baılasý arqyly Atyraý qalasy aýmaǵyndaǵy zırattardan metall aıshyqtar men qulpytastardy qoldy etip, marqumdardyń týystaryna 3 mln 570 myń teńgege materıaldyq shyǵyn keltirgen.
Urlyqty kásip etkender bul qylmystyq is-áreketterimen shektelmeı, Atyraý qalasynyń shaǵynaýdandaryndaǵy 6 turǵyn úı-jaıǵa zańsyz kirý arqyly ártúrli óndiristik tehnıkalardy, altyn buıymdardy, oıyn prıstavkasyn, qurylys quraldaryn jasyryn jymqyrǵan. Sóıtip, turǵyn úı ıelerin 6 mln teńgege shyǵynǵa batyrǵan», - dep málim etti departamenttiń baspasóz qyzmetinen.
Tórt kúdiktige qatysty QR Qylmystyq kodeksiniń 188-baby 3-bóliginiń 1,2,3) tarmaqtary boıynsha sotqa deıingi tergep-tekserý júrgizildi. Qylmystyq is zańdy sheshim shyǵarý úshin sotqa joldandy.
Buǵan deıin «qańtar oqıǵasyna» qatysqan 27 atyraýlyqtyń isi boıynsha sot otyrysy 19 qyrkúıekte ótetinin jazǵan bolatynbyz.