Atyraýda turǵyn úıden 2,5 myńǵa jýyq aqbóken múıizi tárkilendi

ATYRAÝ. QazAqparat – Atyraýda turǵyn úıden aqbókenniń 2500-ge jýyq múıizi tárkilendi. Osyǵan baılanysty úsh kúdikti ustaldy, dep habarlaıdy QazAqparat tilshisi.

Oblystyq polıtsııa departamentiniń baspasóz qyzmetinen málim etkendeı, tárkilengen múıizdiń salmaǵy 500 keliden asady.

«Departamenttiń ekstremızmge qarsy is-qımyl jáne uıymdasqan qylmysqa qarsy kúres basqarmasynyń qyzmetkerleri UQK Atyraý oblysy boıynsha departamentiniń ókilderimen birge «Brakoner» jedel-profılaktıkalyq is-sharasyn ótkizdi. Іs-shara kezinde Atyraý qalasyndaǵy «Bereke» yqsham aýdanynda ornalasqan turǵyn úılerdiń biri tekserilip, jalpy salmaǵy 500 keliden asatyn 2 421 dana aqbóken múıizi anyqtaldy. Osyǵan baılanysty 1991, 1987 jáne 1986 jylǵy kúdiktiler anyqtalyp, ustaldy. Keltirilgen zalal quny 6 mlrd 264 mln teńgeden asady», -dep habarlady departamenttiń baspasóz qyzmeti.

Qazir atalǵan kúdiktilerge qatysty QR Qylmystyq kodeksiniń 339-baby 1-bólinimen qylmystyq is qozǵaldy.

Sotqa deıingi tergep-tekserý júrgizilip jatyr.

Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.

Eske sala ketelik, budan buryn Atyraý oblysynyń turǵynynan 8 kıiktiń múıizi tárkilengenin habarlaǵan bolatynbyz.

«Inder aýdandyq polıtsııa bóliminiń qyzmetkerleri 12 qarasha kúni saǵat 23:30 shamasynda «Ohotazooprom» RMQK batys óńirlik fılıalynyń ınspektorlarymen birlesip, Syraly ýchaskesindegi qystaqtardyń birinen kıikke uqsas janýardyń 8 dana múıizin tárkiledi. Kúdikti retinde atalǵan aýdannyń 1958 jylǵy turǵyny ustaldy. Onyń Órlik aýylynda turatyny anyqtaldy», - dep habarlaǵan edi departamenttiń baspasóz qyzmeti.