Atyraýda turǵyn úıde gaz jarylyp, eki adam japa shekti
Oblystyq tótenshe jaǵdaılar departamentiniń qoǵammen baılanys tobynan málim etkendeı, jarylys búgin, 17 jeltoqsanda bolǵan.
«Departamenttiń dıspetcherlik pýltine tańǵy saǵat 06:06-da Atyraý qalasyndaǵy «Juldyz» shaǵyn aýdanynda ornalasqan turǵyn úıdiń birinde jarylys bolǵany týraly habar tústi. Tótenshe jaǵdaılar departamentiniń qyzmetkerleri oqıǵa ornyna jetken kezde jalpy aýdany 50 sharshy metrlik ýaqytsha turǵyn úıde gazdy-aýa qospasynyń jınalýynan jarylys bolǵanyn anyqtady. Jarylystyń saldarynan úıdiń shatyry qulaǵan. Jalyn tutanyp, turmystyq zattar men bólmeniń kerme tóbesi órtengen. Órtten saldarynan úı ıesi, 49 jastaǵy er adam men onyń 1974 jylǵy áıeli kúıik alyp, oblystyq aýrýhanaǵa jetkizildi. Aldyn ala málimetke qaraǵanda, erli-zaıyptylar 3-4-dárejeli kúıik alǵan. Olardyń denesiniń 90 paıyzy zaqymdalǵan», - dep habarlady departamenttiń qoǵammen baılanys toby.
Turǵyn jarylystan tutanǵan órt saǵat 7:00-de sóndirilgen. Jalyndy sóndirýge tótenshe jaǵdaılar departamentiniń 9 qyzmetkeri men 2 tehnıkasy jumyldyryldy.
«Atyraý oblysynyń turǵyndaryn órt qaýipsizdigi erejelerin qatań saqtaýǵa shaqyramyz. Ásirese, arnaıy mamandarǵa gazben jylytý qurylǵylarynyń jaramdylyǵyn udaıy teksertip, keńesine nazar aýdarý qajet», - dep málim etti departamenttiń qoǵammen baılanys tobynan.
Eske sala ketelik, Atyraýda tozyǵy jetken jylý qazandyqtary jańartylatynyn habarlaǵan bolatynbyz.