Atyraýda turǵyn úıde gaz jarylyp, bir adam mert boldy
ATYRAÝ. QazAqparat – Atyraýda turǵyn úıde gaz jarylyp, bir adam mert boldy. Al, jasóspirim jansaqtaý bólimine tústi, dep habarlaıdy QazAqparat.
Oblystyq tótenshe jaǵdaılar departamenti baspasóz qyzmetiniń málimetinshe, keshe, 2 shilde saǵat 19:30-da Atyraý qalasynyń irgesinde Tasqala eldimekeninde turǵyn úı órtengen.
«Oqıǵa ornyna jedel jetken órt sóndirýshiler jeke turǵyn úıdiń as daıyndaý bólmesinde gaz-aýa qospasynyń jınalýynan órt shyqqanyn anyqtady. Órt saǵat 20:00 kezinde sóndirildi. Jalyndy sóndirýge tótenshe jaǵdaılar departamentiniń jeke quramynan 12 qyzmetker men 3 tehnıka jumyldyryldy» dep málim etti departamenttiń baspasóz qyzmetinen.
Belgili bolǵandaı, órt saldarynan oqıǵa ornynda 1972 jyly týǵan áıel mert bolǵan.
Al, 2009 jyly týǵan jasóspirim 85% termııalyq kúıikpen oblystyq balalar aýrýhanasyna jetkizilgen. Qazir óte aýyr jaǵdaıda jansaqtaý bóliminde jatyr.
«Órttiń shyǵý sebebi – gaz jabdyǵyn paıdalaný kezinde qaýipsizdik sharalarynyń buzylýy. Otbasynyń basqa músheleriniń aıtýynsha, ózderi gaz plıtasyn gaz jelisine arnaıy mamandardyń qatysýynsyz jalǵaǵan. Bul – gaz jáne jylytý qurylǵylaryn paıdalaný erejelerin óreskel buzý» dep habarlady departamenttiń baspasóz qyzmeti.
Eske sala ketelik, budan buryn Atyraýda ıesi bolmaǵan kezde kópqabatty turǵyn úıdegi páter órtengen bolatyn.
