Atyraýda turǵyn úı kooperatıviniń quryltaıshylaryna qatysty qylmystyq is tergelip jatyr
Atyraý oblysy ákiminiń orynbasary Qaırat Bekenovtyń tóraǵalyǵymen «Jibek joly» turǵyn úı kooperatıviniń úleskerlerimen kezdesý ótti. Oǵan oblystyq sáýlet jáne qala qurylysy basqarmasynyń, memlekettik sáýlet-qurylys baqylaý basqarmasynyń basshylary qatysty.
Atyraý qalalyq polıtsııa basqarmasynyń aǵa tergeýshisi M.Qadyrovtyń aıtýynsha, «Jibek joly» turǵyn úı kooperatıviniń quryltaıshylaryna qatysty kóterilgen qylmystyq is tergelip jatyr. Qylmystyq isti tamyz aıynda sotqa jiberý kózdelip otyr.
«Qazir «Jibek joly» jáne «Aq marjan» turǵyn úı keshenderine qatysty týyndaǵan daýly máseleni Atyraý oblysynyń ákimi Serik Shápkenovtiń ózi qadaǵalap otyr. Oblys ákimi turǵyn úı keshenderiniń qurylysyna baılanysty týyndaǵan jaǵdaı, Atyraý qalasynyń aýmaǵyndaǵy ózge de turǵyn úı keshenderiniń qurylysyn aıaqtaý jóninde birneshe márte kezdesý men jıyn ótkizdi», -deıdi oblystyq memlekettik sáýlet- qurylys baqylaý basqarmasynyń basshysy Erlan Qabdınov.
Onyń aıtýyna qaraǵanda, «Jibek joly» jáne «Aq Marjan» turǵyn úı keshenderiniń quryltaıshylary – bir tulǵalar. Endi atalǵan turǵyn úı keshenderiniń qurylysyn aıaqtaý úshin ınvestorlardy izdeý sot úkimi shyqqan soń júzege asady. Óıtkeni, tergeý kezinde turǵyn úı kesheniniń qurylysyna keltirilgen shyǵyn kólemi ózgerip tur.
«Atalǵan turǵyn úı keshenderiniń úleskerleri arasynda quqyq qorǵaý organdaryna áli aryzdanbaǵandar bar. Sonyń saldarynan keltirilgen shyǵyn kólemin anyqtaý qıynǵa soǵyp tur. Sebebi, bolashaq ınvestorlarǵa qurylysty aıaqtaý úshin qajetti qarjynyń naqty kólemi anyqtalýy kerek»,- deıdi Erlan Qabdınov.
Eske sala ketelik, budan buryn 45 mln teńgege 3 páter alyp beremin dep Almaty turǵynyn aldaǵan atyraýlyq áıel ustalǵanyn https://kaz.inform.kz/news/45-mln-tengege-3-pater-alyp-beremin-almaty-turgynyn-aldagan-atyraulyk-ayel-ustaldy_a3916096 jazǵan bolatynbyz.
