Atyraýda turaqtandyrý qoryndaǵy kókónister saýdaǵa shyǵaryldy

ATYRAÝ. QazAqparat –Atyraýda turaqtandyrý qoryndaǵy kókónister satyla bastady, dep habarlaıdy QazAqparat óńirlik kommýnıkatsııalar​ qyzmetine silteme jasap.

«Atyraý» áleýmettik-kásipkerlik korporatsııasy» AQ turaqtandyrý qoryndaǵy oblys ortalyǵyndaǵy saýda ortalyqtary arqyly satylymǵa shyǵarylǵan.

«Jergilikti «Agrofelıks» sharýa qojalyǵymen arada jasalǵan kelisim-shartqa sáıkes, turaqtandyrý qorynyń qoımasynda 361 tonna kartop,​ 79 tonna pııaz, 49 tonna sábiz, 114 tonna oramjapyraq alyndy. Bul ónimder «Nasıha», «Kóktem»,​ «Saraıshyq» bazarlary arqyly tutynýshylarǵa usynylyp otyr» - deıdi​ «Atyraý» ÁKK» AQ memlekettik jobalardy iske asyrý departamenti dırektorynyń mindetin atqarýshy Gúlmıra Meńdalıeva.

Onyń aıtýynsha, bıylǵy mamyrda «Ideal Market» JShS-men 400 mıllıon teńgege kelisim-shart jasalǵan. Kelisimge sáıkes, atalǵan seriktestiktiń 36 sýpermarket jelisi arqyly 15 túrli áleýmettik mańyzy bar azyq-túlik satylady. Mundaı azyq-túliktiń quramyna birinshi surypty bıdaı uny, nan, makaron ónimderi, qaraqumyq, kúrish, kúnbaǵys maıy, sıyr eti, taýyq eti, sút, aıran, sary maı, birinshi sanatty taýyq jumyrtqasy, as tuzy, maılylyǵy 5-9 paıyzdyq irimshik pen kókónistiń birneshe túri engizilgen.

Qazir saýda ortalyqtarynda kartoptyń kelisi 94 teńgeden, pııaz – 81, sábiz – 91, oramjapyraq 92 teńgeden satylyp jatyr. Oblysy ákimdigi bekitken ​ taýarlar naryqtan qunynan 10-15 paıyzǵa arzan baǵamen usynylady.

Eske sala ketelik, budan buryn Atyraýda áleýmettik mańyzdy taýarlar naryqtaǵy baǵadan arzanǵa satylyp jatqanyn habarlaǵan edik.