Atyraýda turaqtandyrý qoryna qosymsha 17 115 tonna un satyp alynady
ATYRAÝ. QazAqparat –Atyraý oblysynda turaqtandyrý qoryna qosymsha 17 myń 115 tonna un satyp alynady, dep habarlaıdy QazAqparat.
Atyraý qalalyq kásipkerlik jáne týrızm bóliminiń málimetine qaraǵanda, qazir 8 naýbaıhana úzilissiz jumys istep tur. Olarda táýligine 40 myń bólke nan pisiriledi. Al «Dáýlet Nan» JShS-niń nan pisirý tsehy óndiris qýatyn ulǵaıtýdy kózdep otyr. Munda osy kezge deıin táýligine 7 myń bólke nan pisirilgen. Endi ol kólem táýligine 15 myńǵa deıin arttyrylady.
«Qazirgi ýaqytta nan tsehynda 90 adam jumys isteıdi. Jumysshylar sanyn qysqartpaımyz. Kerisinshe, qosymsha adamdardy tartyp, jumysshylar qataryn kóbeıtemiz», - deıdi «Dáýlet Nan» JShS-niń ókili Farýh Abdýllaev.
Óńirlik kommýnıkatsııalar qyzmetiniń málimetinshe, Atyraý oblysynda 824 tonna un qory bar. Onyń 520 tonnasy turaqtandyrý qorynda saqtaýly tur. Jergilikti ákimdik tótenshe jaǵdaı kezindegi turaqtylyqty saqtaý úshin qosymsha 17 myń 115 tonna un satyp alýdy josparlap otyr.
