Atyraýda túngi tynyshtyqty buzǵan 1500 adam jaýapkershilikke tartyldy
ATYRAÝ. QazAqparat – Atyraýda jyl basynan beri túngi tynyshtyqty buzǵan 1500-den astam adam ákimshilik jaýapkershilikke tartyldy, dep habarlaıdy QazAqparat.
Jergilikti polıtsııa qyzmetiniń qyzmetkerleri jalǵa beriletin páterler men úılerde turatyn adamdardyń tıisti qujattaryn jáne tirkelýine tekserý júrgizdi. Máselen, №2 qalalyq polıtsııa bóliminiń ýchaskelik polıtsııa ınspektorlary Vokzal mańy shaǵyn aýdanynda ornalasqan kópqabatty úılerden salyq organdaryna tirkelmegen 5 páterdi anyqtady.
«Ádette, páterlerdi táýlikke, saǵattap jáne kúndelikti jalǵa alýshylardyń túngi tynyshtyqty buzatyny týraly jergilikti turǵyndardyń tarapynan narazylyq kóp túsedi.
Sondaı derektiń biri SMP shaǵyn aýdanynda ornalasqan kópqabatty úılerdiń birinde oryn aldy. Osyndaǵy kóp qabatty úıde turatyn 33 jastaǵy azamat kórshileriniń túngi tynyshtyqty buzǵany jóninde polıtsııaǵa habarlama bergen. Tekserý kezinde páterdi táýliktik jalǵa alǵan 4 azamatsha anyqtaldy. Olarǵa qatysty QR Ákimshilik quqyqbuzýshylyq týraly Kodeksiniń 437-babymen (Saǵat túngi 22:00-den tańǵy 9:00-ǵa deıin tynyshtyqty buzý) ákimshilik hattama toltyrylyp, árqaısysyna 5 aılyq eseptik kórsetkish kóleminde aıyppul salyndy» dep habarlady oblystyq polıtsııa departamentiniń baspasóz qyzmeti.
Jyl basynan ýchaskelik polıtsııa ınspektorlary oblys ortalyǵynda jalǵa beriletin 1800-ge jýyq páterdi tekserip, salyq organdaryna tirkelmegen 500-den astam páter ıelerin anyqtaǵan. Sondaı-aq, túngi tynyshtyqty buzǵan 1500-den astam tulǵa QR Ákimshilik quqyqbuzýshylyq týraly Kodeksiniń 437-babymen jaýapkershilikke tartylǵan.
Eske sala ketelik, buǵan deıin Atyraýda bir aptada 325 quqyq buzýshylyq anyqtalǵan bolatyn.
