Atyraýda túngi sot jumys isteıdi
ATYRAÝ. QazAqparat - Atyraýda túngi sot jumys isteıdi, dep habarlaıdy QazAqparat tilshisi oblystyq sottyń baspasóz qyzmetine silteme jasap.
Bul týraly Atyraý oblystyq sotynyń azamattyq ister jónindegi sot alqasynyń tóraǵasy Manat Komırshınov pen Atyraý oblystyq Іshki ister departamenti bastyǵynyń orynbasary Berik Amangeldiniń kezdesýi barysynda málim boldy.
Kezdesýde M.Komırshınov Atyraýda shet elderdiń tájirıbesi negizinde usaq isterdi qaraýǵa ýaqyt bólý úshin túngi sottyń jumysy engiziletinin aıtty. Onyń sózinshe, mundaı isterge jol-kólik oqıǵasy, otbasy-turmystyq qatynastar, usaq buzaqylyq jáne t.b. quqyqbuzýshylyqtar jatady.
«Erejege sáıkes, JKO qatysýshylardyń isti saǵat 13.00 den 22.00 aralyǵynda qaraýǵa kelisimi bolǵan jaǵdaıda, ókiletti organnyń qyzmetkeri sotqa kelý týraly ýaqyty men orny kórsetilgen talondy toltyryp, ákimshilik quqyqbuzýshylyq týraly hattamany joldaıdy. Bul rásim JKO bolǵannan keıin úsh táýlikten asyp ketpeýi tıis. Eger de JKO qatysýshy óz pikirin ózgertý jóninde sheshim qabyldasa, sýdıa isti jalpy tártipte qaraý úshin keıinge qaldyrady»,-delingen sot taratqan habarlamada.
Aıta ketý kerek, «Túngi sot» pılottyq jobasy aıasynda Atyraý oblystyq soty men Atyraý oblystyq Іshki ister departamenti arasynda yntymaqtastyq týraly memorandým jasaqtaldy.
