Atyraýda túngi marafon aıaqtaldy
ATYRAÝ. QazAqparat - Astananyń 20 jyldyq mereıtoıyna oraı Atyraý qalasynda tuńǵysh ret túngi marafon uıymdastyryldy. Oǵan 2 myńǵa jýyq adam qatysty, dep habarlaıdy QazAqparat tilshisi.
«Atyraý qalasyndaǵy marafon jylyna bir ret ótkiziledi. Al túngi marafondy qalanyń turǵyndary men qonaqtarynyń qyzyǵýshylyǵyn arttyrý úshin uıymdastyrdyq. Bul, jastardyń sportpen turaqty aınalysýyna úlken múmkindik beredi. Túngi marafonǵa qatysýshylardyń deni jastar. Arasynda qarttar da az emes. Osyndaı sporttyq sharalar arqyly jastardy salaýatty ómir saltyn ustanýǵa shaqyra alamyz», - deıdi «Atyrau Marathone-2018» uıymdastyrý komıtetiniń vıtse-prezıdenti ıÝrıı Ponomarev.
Tuńǵysh ret uıymdastyrylǵan túngi marafon muz saraıynyń aldynan bastalyp, Atyraý oblystyq ákimdigi ǵımaratyna deıin 5 shaqyrymǵa sozyldy.
Nátıjesinde, Atyraý marafonynyń turaqty qatysýshysy 24 jastaǵy Bazarbaı Dáýtalıev jeńiske jetti. Onyń jeńil atletıkamen aınalysqanyna 5 jyldan asqan. Bazarbaı jeńimpaz medalin moınyna taqty.
Barlyq qatysýshylarǵa sóre aldynda neon bilezikter, al márege jetken soń estelik medaldar berildi. Sondaı-aq, erler men áıelder arasynda úzdik kelgen 10 qatysýshyǵa arnaıy syılyqtar tabys etildi.
Jarys uıymdastyrýshylarynyń aıtýynsha, mundaı marafondar aldaǵy ýaqytta da jalǵasyn taba bermek.
