Atyraýda túngi azyq-túlik jármeńkesi ótti
ASTANA. QazAqparat - Jeltoqsannyń 15-inen 16-syna qaraǵan túni Atyraýdaǵy «Saraıshyq» bazarynda aýyl sharýashylyǵy ónimderiniń túńgi jármeńkesi ótti, dep habarlaıdy Óńirlik kommýnıkatsııalar qyzmeti.
Jármeńkege barlyǵy 150 kásipker qatysty. Onyń 130-y «Saraıshyq» kásipkerleri, al qalǵan 20-sy kóterme saýdamen aınalysatyn kásipkerler. Sondaı-aq, Mahambet, Inder aýdanynan kelgen kókónis satýshylary óz ónimderin halyqqa usyndy.
Atyraý qalalyq kásipkerlik jáne týrızm bóliminiń basshysynyń mindetin atqarýshy Altynaı Sársenqyzynyń aıtýynsha, jármeńkedegi ónimder qazirgi bazar naryǵynan 20-30 paıyzǵa arzan baǵamen satylyp jatyr. Ádette et 1 500 teńge bolsa, búgingi baǵa 1 300 -1 350-ge túsken, qazy - 2 000, jumyrtqa 19 teńge baǵasy qoıyldy. Al, alǵashqy 45 mınýtta satylǵan 5 tonna kartop saýdany qyzdyra tústi.
«Búgingi jármeńkede ár kásipker ártúrli jeńildikter jasap jatyr. Sol úshin bul jármeńkeniń ótkizý ýaqyty halyqtyń yńǵaıyna qaraı tańdaldy. Sondaı-aq, bul jerge jınalǵan kóp turǵynnyń baryp-kelýin arnaıy eki marshrýt qamtıdy. Tutynýshylardy tasıtyn Saraıshyq bazary-Avangard yqsham aýdany, Saraıshyq bazary-Akademııa aıaldamasy aralaryn jalǵaıtyn 6 avtobýs shyǵaryldy», - dep málimdedi Atyraý qalalyq kásipkerlik jáne týrızm bóliminiń basshysynyń mindetin atqarýshy Altynaı Sársenqyzy.
Aıta keteıik, halyqtyń usynysy boıynsha erteń kúndiz bul jármeńke óz jalǵasyn tabady. Jańa jyl qarsańyna osyndaı jármeńkeni ótkizý josparlanýda.
