Atyraýda tún ortasynda tóbelesken eki jigittiń isi sotqa joldandy
Oblystyq polıtsııa departamenti baspasóz qyzmetiniń málimetinshe, 10 shildede saǵat 03:57 shamasynda eki jigittiń tóbeleskeni beınebaqylaý kamerasyna túsip qalǵan.
«Atyraý qalasyndaǵy «Almagúl» shaǵynaýdanynda ornalasqan úılerdiń biriniń aýlasynda eki er adam tóbeles shyǵarǵan. Atyraý qalalyq polıtsııa basqarmasynyń jedel basqarý ortalyǵynyń qyzmetkerleri janjaldasqan jigitterdi beınebaqylaý arqyly baıqap qalǵan. Sodan keıin patrýldik polıtsııa qyzmetkerlerine tıisti málimetter bergen», - dep málim etti departamenttiń baspasóz qyzmetinen.
Patrýldik polıtsııa qyzmetkerleri oqıǵa ornyna jedel jetip, eki er adamdy ustady. Onyń biri – Batys Qazaqstan oblysyndaǵy Oral qalasynyń, ekinshisi Atyraý oblysynyń Mahambet aýdanynyń turǵyny ekeni anyqtaldy.
Alkogoldik ishimdik ishken eki jigit bir-birimen janjaldasyp, sońy tóbeleske ulasqan. Sol sebepten, tártip saqshylary olardy medıtsınalyq saraptamadan ótkizýge sheshim qabyldaǵan. Medıtsınalyq saraptamanyń qorytyndysymen tóbelesqumarlardyń orta dárejeli mas kúıde ekeni belgili boldy.
Qazir tún ortasynda qoǵamdyq orynda tóbelesken 41 jáne 30 jastaǵy eki azamatqa qatysty QR Ákimshilik quqyqbuzýshylyq týraly kodeksiniń 434-babynyń 1-bóligimen (Usaq buzaqylyq) ákimshilik hattama toltyryldy. Al, jınaqtalǵan is-qujattar sheshim qabyldaý úshin ákimshilik sotqa joldandy. Endi olar sot sheshimimen bes aılyq eseptik kórsetkish kóleminde aıyppul tóleýi nemese on táýlikke ákimshilik qamaýǵa alynýy múmkin.
Eske sala ketelik, budan buryn Atyraýda jyl basynan beri mas kúıde rýlge otyrǵan 270 júrgizýshi ustalǵanyn https://kaz.inform.kz/news/atyrauda-zhyl-basynan-beri-mas-kuyde-rul-ge-otyrgan-270-zhurgizushi-ustaldy_a3952609 habarlaǵan bolatynbyz.