Atyraýda tún ishinde qar qursaýynda qalǵan kólikten ana men bala qutqaryldy
Oblystyq tótenshe jaǵdaılar departamentiniń qoǵammen baılanys tobynan málim etkendeı, 16 aqpanda túngi saǵat 22:45-te jol talǵamaıtyn kóliktiń qarǵa batyp qalǵany týraly aqpara túsken.
«Inder aýdanynyń ortalyǵy – Inderbor kentinen 4 adam «Mitsubishi Pajero» markaly kóligimen qystaqtardyń birine barý úshin jolǵa shyqqan. Alaıda, jolaýshylar dittegen jerine jete almaı, aýdan ortalyǵynan shamamen 30 shaqyrym qashyqtyqta jolda turyp qalǵan. Buǵan avtokólik qarǵa batyp, júre almaǵany sebep bolǵan. Osyǵan baılanysty Inder aýdandyq tótenshe jaǵdaılar jáne órt sóndirý bólimderiniń 3 qyzmetkeri avarııalyq-qutqarý jumysyn júrgizý úshin oqıǵa ornyna attandy», -dep habarlady departamenttiń qoǵammen baılanys toby.
Qutqarýshylar oqıǵa ornyna jetkende qarǵa batqan avtokólikte 4 adamnyń bary anyqtaldy. Onyń úsheýi eresek, bireýi bala.
Qar qursaýynan qutqarylǵan 4 adam kóligimen birge Inderbor kentine aman-esen jetkizilgen. Qutqarylǵan jolaýshylar medıtsınalyq kómekti qajet etpegen.
«Kólik júrgizýshileri men turǵyndardan qys mezgilinde túnge qaraı jolǵa shyqpaýdy suraımyz. Óıtkeni, qazir Atyraý oblysynda da qalyń qar jaýdy. Aýa raıy jıi qubylyp tur. Qalyń qar jaýdy. Osyǵan baılanysty aýa raıynyń qubylýy týraly 112 qyzmeti jiberetin SMS habarlamalardy eskerip, alys jolǵa shyǵýdy keıinge qaldyrǵan jón», -dep málim etti departamenttiń qoǵammen baılanys tobynan.
Eske sala ketelik, buǵan deıin Atyraý oblysynda bir kún buryn iz-túzsiz joǵalyp ketken malshy tabylmaı jatqanyn, keıin onyń ózi turatyn qystaqtan 5 shaqyrym qashyqtyqtan tabylǵanyn jazǵan edik.
Foto: Atyraý oblysy TJD
