Atyraýda «Tulǵalar alleıasy» ashyldy
ATYRAÝ. QazAqparat - Atyraýda halqymyzdyń birtýar azamattarynyń qurmetine «Tulǵalar alleıasy» ashyldy, dep habarlaıdy QazAqparat tilshisi.
H.Dosmuhamedov atyndaǵy Atyraý memlekettik ýnıversıtetinde paıda bolǵan alleıaǵa bilim, ǵylym, mádenıet jáne óner salasynda aıryqsha iz qaldyrǵan tulǵalardyń bıýstteri ornatyldy. Atap aıtqanda, Muhambet-Salyq Babajanovtyń, Murat Móńkeulynyń, Baqtygereı Qulmanovtyń, Yǵylman Shórekovtiń, Salyq Zımanovtyń, Zeınolla Qabdolovtyń, Nurmuhan Jantórınniń, Ábish Kekilbaevtiń eskertkish-bıýstteri qoıyldy.
Saltanatty sharaǵa ardaqty azamattardyń urpaqtary, týys-týǵandary qatysty. Olardyń qatarynda, Qazaqstannyń eńbek sińirgen qaıratkeri, Mahambet jáne Ahmet Baıtursynov atyndaǵy syılyqtardyń ıegeri, aqyn Qoıshyǵul Jylqyshıev, akademık Zeınolla Qabdolovtyń balasy Baqyt qajy Qabdolov, Nurmuhan Jantórınniń qyzy Bahyt Jantórına, akademık Salyq Zımanovtyń kelini Jannat Zımanova boldy.
Alleıanyń ashylýy barysynda Qazaqstannyń Reseıdegi Tótenshe jáne Ókiletti Elshisi Imanǵalı Tasmaǵambetovtiń quttyqtaý haty oqyldy.
